U·IATTIMGIPAONI
TURA: Tura-ni Rongkhon Songgital jolo police-rangni kragija dake dokani a·sel bilsi 20 ong·gipa me·chik saksa skoo mata bu·anirangko man·na nangaha ine social media-rango matnangtokani ja·man ia a·selni bidingo inquiry-ko dakchina gita West Garo Hills Police ge·etaniko on·angaha.
Bilsi 20 ong·gipa me·chik saksako police sakgittam, beer bottle-rangchi uni skoo dokahani a·sel uni skorango mata bu·anirangko man·na nangaha ine Bristibar pringo, social media-rango matnange seanirangko nikna gita man·ahachim.
Ia a·selni bidingo talataniko on·angskaengon, da·o ia a·selko sandirokna gita West Garo Hills police ge·etaniko on·manaha aro sandirokanirangko matchotahaon kakketko ma·sina man·gen ine West Garo Hills a·jani Superintendent of Police (SP) Abraham T Sangma parakataha.
SP-ni parakatani gitade, September-ni 13 tarik Budbar walo police-rang, Tura-ni Rongkhon Songgital-o donggipa gopram jolchipak patrolling ka·angon, ua jolo dolsa pante me·trarangni ringe cha·e roengmitingko nikeahachim.
“Rongkhon Songgital jolo pante me·trarang ringe cha·e roenga ine jolo songdongenggipa manderangni badi ka·aniko man·soani ja·man Araimile Beat House-ni SI-ni dilanichi dolsa police-rang, ua biapona re·ange nion, ua biapo pante me·trarangni ringe cha·e roengako nikeaha. Police-rangko niksoon, uamangoni bang·batan ua biaponi katangtokaha indiba mitamrangde ua biaponi re·angna siktokjahani gimin police-rang uamangni kosako bilko jakkalna nangaha. Ja·mano pante me·trarang ua biaponi re·angtokahaon police-rangba ua biaponi re·bapilaha,” ine SP parakataha.
Indake ong·genchimoba, Bristibar pringosa ia me·chikni skoo mata bu·a man·aniko social media-rango niksona man·aha aro uandaken ia a·selni bidingo inquiry-ko dakna gita ge·etaniko on·ataha ineba SP parakataha.
“Name am·sandiani ja·man chinga bon·kamao ia me·chikko ma·siaha aro uan saksa chatriba ong·achim. Ua maikai saknaanirangko man·aha aro ua saming roachim, chinga uarangko uo sing·sandiaha indiba ua mamingkon aganna gita sikjaha indiba ua an·tangba ua biapo dongachim inesa ua aganaiaha. Chinga iarangko uni ma·a paani mikkangon sing·sandie ra·aha,” ine SP parakataha.
SP-ni parakatani gitade, uko police-rang beer bottle-rangchi dokaha ine matnanganikoba ia me·chik jechakskaaha.
Indake ong·engon, ia a·selko DSP gadangni officer sandirokenga aro ia a·selko Women’s Police cell-ni jako pakwataha ineba SP parakataha.
