U·IATTIMGIPAONI
SHILLONG: A·doko education commission dongani gimin National Education Policy (NEP) 2020-ko ra·gatanio dingtang dingtang institute-rangni aro manderangni neng·nikanirang baksana nangnikanirangkoba a·dok ma·sichengesa ja·kurangko de·na nanggen ine Robibar salo, United Democratic Party (UDP)-ni general secretary Jemino Mawthoh parakataha.
“Education Commission dongahani gimin dingtang dingtang institute-rangni aro a·doko songdongenggipa manderangni neng·nikanirangko aro nangnikanirangko an·ching ma·sie ra·enba re·mikkangna man·gen,” ine Mawthoh aganaha.
NEP ra·gataniko dontongpilgenchimoba chatro chatrirangnan nangchakeanirang dongskagen ineba ua aganaha.
Bang·bata college-rangon NEP-ko ra·gatmantokaha aro Principal-rangni council-ba NEP-ko ra·gatna ra·chakmanaha ine janapatengon, darang college-rangan NEP-ko mikkang bilsioni ra·gatskana bi·giparangba dongjaha ine UDP-ni general secretary parakataha.
“Dingtang dingtang dolrangni aro skigipa dolrangni jajrengchakanirangara asolrangan ong·ani giminsa anga uamangni neng·nikanirangko jinmana u·iatenga indiba dingtang dingtang college-rangni neng·nikanirangko an·ching namatchengna nanggen,” ine ua aganaha.
“Dingtangataniko ra·baanio neng·nikanirangde dongaigen aro iandakgipa ra·bianirangko an·ching mikkangpae re·mikkangna nanggen. An·ching ja·manchake dongna man·jawa. Meghalaya a·doko lekka porani ja·manchakenganiko nie an·ching ia cholko ra·na nangchongmotenga,” ineba Mawthoh aganaha.
2016 bilsionin undergraduate level-o Choice Based Credit System-ko ra·gatna man·jahani a·sel a·songni gipin institute-rang baksa tosusagenchimode a·doko major paper-rang komibata ine janapatengon, “Iani a·selan gipin a·dokrango admission ra·na nangenggipa a·dokni chatro chatrirang neng·nikanirangko chagrongna nangenga aro apsan daken CUET aro gipin competitive exam-rangko seanioba neng·nikanirangko chagrongna nangenga,” ine UDP-ni general secretary parakataha.
“An·ching nokko rikna nangenga ong·ode, nokona rama, chi, bijoli aro uandakgipa nanganirangni sokbaaniko senge dongchengna nangjawa. An·ching nokko rikchengesa ja·mano chi, bijoli, rama aro uandakgipa nanganirangnade tikkelgen,” ine Mawthoh, toe aganaha.