U·IATTIMGIPAONI
TURA: Garo Hills Autonomous District Council (GHADC)-o kam ka·enggiparangna jagnini dormaharangko ia antini bon·angachibara on·na gita GHADC-ni Chief Executive Membor (CEM) Albinush Marak, Sombar attamchibara ku·rachakaniko on·angahani gimin Non-Gazetted Employees Association (NGEA)-ni kamrangko dontongate jingjengatna manchianiko dontongatchengaha.
GHADC-o kam ka·enggipa manderang, dormahatangtangko man·gija da·o ja 31 ong·pilengahani gimin Sombar salni bako GHADC-ni Non-Gazetted Employees Association (NGEA), tom·e chanchirimangenba, kamrangko dontonge jingjengatna tik ka·angahachim ine nikna man·a.
Indake ong·genchimoba ja·mano GHADC-ni CEM, kam ka·giparangko grongenba, jagnini dormaharangko ia antini gisepon on·na ku·rachakahani gimin kam ka·giparang, jingjengatna manchianiko dontongatchengpilaha.
“CEM-ni ku·rachakaniko man·ahani gimin chinga chingni jingjengataniko dontongatchenge ia antini bon·aona senge nikuna tik ka·angaha. CEM-ni ku·rachakgimin gita ia antini gisepo chingna dormaharangko on·jagenchimode chinga re·baenggipa antini Sombar sal dipet kamrangko ka·gija jingjengatangskana tik ka·angaha,” ine NGEA-ni president Brithen Sangma, kobor ra·timgiparangna parakataha.
