U·IATTIMGIPAONI
SHILLONG: Meghalaya a·dokoba mang 9000-na baten matchurang, Lumpy Skin Disease (LSD)-ko man·tokahani a·sel jile kae cha·enggipa manderang bang·en noksan ong·atako man·na nangahani gimin sorkari, matchu nokgiparangna compensation-rangko ba tangka paisarangko gamskana tik ka·angaha.
Mongolbar salo, a·dokni Animal Husbandry & Veterinary (AH&V) Minister AL Hek-ni Assembly-o parakatani gitade, LSD man·gipa matchurangni nokgiparangna da·o dipet sorkari tangka paisarangko gamkujaenga indiba mikkangchi iandake noksan ong·atako man·gipa manderangna sorkari, tangka paisarangko gamna miksongenga.
LSD-ni a·sel matchu matterangko jile kae cha·enggipa manderang, an·tangtangni matchu matte jilram biaprangko chipna nangtokahani gimin sorkari, iandakgipa manderangna tangka paisarangko gamskagenma ine Nongkrem-ni VPP MLA Ardent Miller Basaiawmoit-ni sing·anina aganchakaniko on·angengon, LSD-ni a·sel nangchakeako man·gipa manderangna sorkari, tangka paisarangko gamskagen ine Hek parakataha.
Meghalaya a·doko mang 9000-na baten matchurang LSD-ko man·aha ine janapatengon, LSD-ko warachakna gita a·dokni dambri veterinary hospital-rango aro dam 125 dispensary-rango sam aro tikarangko on·enga ine AH&V Minister parakataha.
2020-21 bilsirango African Swine Fever (ASF) sabisiko man·e mang 540 wakrang siangna nangahani gimin, wak jilgiparangna sorkari, gimik gong 16,20,000 tangkarangko gamaha ineba Hek parakataha.
Meghalaya a·dokona gipin biaprangoni wak bi·sarangko ra·bae sualani a·selsa ASF sabisiko man·na a·bachengaha ine VPP MLA-ni matnanganina aganchakaniko on·angskaengon, a·doko wakrang chu·ongjani gimin gipin biaprangoniko wakrangko ra·bana nangao ga·akaia ine AH&V Minister parakataha.
