U·IATTIMGIPAONI
TURA: Jawilwat tariani, dakmesokanirang, jatni doka dam·ani aro jakni kamrangko skie on·na gita Arts & Culture department-ni salbongana ong·atenggipa ‘Nokpante’ Workshop-ko mijal Sombar salo, Tura-ni District Auditorium-o a·bachengataha.
Ia workshop-ko a·bachengatanio, Art & Culture department-ni Director Dikki D Shira, Urban Project-ni bidingo talate on·angengon, dingtang dingtang jakni kamrangko apsan gadangona ra·bana gita ia umbrella project-ko 2019 bilsio a·bachengataha aro project-ko re·anggipa 2022 bilsini November jao a·bachengatanio chu·sokgipa ong·aniko nike da·o ia gnigipa workshop-koba ong·atna tik ka·angaha ine parakataha.
Ia workshop-ko September 18 tarikoni September 22 tarikona ong·atenga aro ia workshop-o skie on·enggipa manderangara, ‘Film Making Workshop’-o Dominic Megam Sangma, ‘Art in Community Workshop’-o Marbosing Marbaniang, ‘Theatre workshop’-o Jyoti Narayan Nath, ‘Folk Traditional Instrument workshop (Dotdrong)-o Tangsrik A Sangma, ‘Folk Traditional Instrument workshop (Chiring)’-o Chekam A Sangma aro ‘Theatre workshop’-o dakchake on·enggipa Balsrame A Sangma ong·a.
Ia workshop-ko a·bachengatanio Garo Hills Autonomous District Council (GHADC)-ni Chief Executive Membor (CEM) Albinush R Marak, jinmana aganprakangengon, jatni daka rikani aro gipin jakni kamrangko skie ra·na gita ia workshop-o bakko ra·na man·aniara ia jolni manderangna namgipa chol ong·aha ine mikkangchiba jatni daka rikanirangko ripingna gita rakbee kamrangko ka·angkuchina ia workshop-o bak ra·enggipa manderangko didiangaha.