U·IATTIMGIPAONI
SHILLONG: Meghalaya a·doko songdongenggipa Tribal manderangko chel·chakna gita Meghalaya Residents Safety & Security Act (MRSSA) aro Inner Line Permit (ILP) baksana Article 371 A gita dakgipa niamrangkoba ra·gatna nangenga ine Khasi Students Union (KSU) parakataha.
“Chingnade badita niamrangko ra·gatna man·a, uan nambatgipa ong·gen. Salgro salaramni gipin a·dokrangko niatgenchimode gipin a·dokrango Article 371, ILP aro Sixth Schedule-rangkoba donataha, uni gimin Meghalaya a·doknaba chingni dabienga gita MRSSA aro ILP baksana Article 371 gita dakgipa niamrangko ra·gatna nanga,” ine KSU-ni general secretary Donald V Thabah aganaha.
MRSSA-ko adita taridapna nanganirang baksa ma·mong sorkari watatpilaha ine Chief Minister Conrad K Sangma-ni agangipa kattarangna KSU-ni dilgipa, iako aganskaaha.
“Ma·mong sorkari, CAA gita dakgipa niamrangko ra·gatna jotton ka·engani gimin chingna ILP baksana Article 371 A gita dakgipa niamrangkoba ra·gataniko chinga nangnikenga,” ine Thabah aganaha.
MRSSA-ara 2016 bilsionin a·dokni Act ba niamsa ong·achim ine janapatengon, ua somoion ia niamko name ra·gatna nangachim indiba ia mongsonggipa niamko ra·gatanichi baditana kingking chu·sokgipa ong·gen, uko name nichenggija, niamni mitam bakrangko a·dok sorkari taridapaha aro iarangko taridapahani a·selsa da·o ma·mong sorkarini jakona sokaha ine KSU-ni general secretary parakataha.
“MRSSA-ko ra·gatanio maini gimin ma·mong sorkari jak dongna nanga? Maini gimin ia niam Ministry of Home Affairs (MHA)-ona sokangna nanga? Gitcham sorkarini somoion MRSSA-ko ra·gatna gita tarimanahachim indiba niamni mitam bakrangko taridapahani a·sel da·o iako ma·mong sorkariona watatna nangaha. Iani bidingo a·dok sorkari talataniko on·na nanga,” ine Mawthoh aganaha.
MRSSA-ni bidingo ma·mong sorkarini aganchakaniko a·dok sorkari man·soaha ine re·anggipa Sukrobar salosan, a·dokni Chief Minister Conrad K Sangma parakatahachim ine nikna man·a.
Chief Minister-ni parakatani gitade, ma·mong sorkarini aganchakaniko man·soani ja·man da·o ia MRSSA-ko jako ra·angkuani bidingo a·dok sorkari chanchiengkua.
