nikaiani giminde jak dongaia ong·ja ine Conrad jegalskaa
U·IATTIMGIPAONI
SHILLONG: Drugs ba pekatgipa samrangko badinganio Mizoram a·dokni mongsonggipa mande baksa Meghalaya a·dokni Chief Minister Conrad K Sangma jak donga aro ia mandeko New Delhi-ni dal·begipa program-o napna on·anioba Chief Minister-ni office-onin jak donga ine Mongolbar salo, a·dokni gitcham Chief Minister aro Opposition TMC parliamentary party-ni dilgipa Mukul Sangma, Assembly-o jinmana parakataha.
Assembly-ni Autumn Session-o a·doko pekatgipa samrangko jakkalani aro badingani bidingo VPP-ni MLA Ardent Miller Basaiawmoit-ni chanchirimdilanio bakko ra·paengmiting somoio Mukul Sangma, ia kattarangko aganaha.
“A·doko pekatgipa samrangko champengna gita ia rakbegipa kamo officer-rangko man·chape an·ching an·tangtangkoba jak dongama dongja sandirokna nangaon ga·akenga,” ine Sangma aganaha.
Politician-rang ong·e uamang pilakan namen simsakbegiparang ong·na nanga ine janapatengon, “An·ching sako grongenga aro saming songre songgabatenga, saming party ka·e roenga ia pilakon namen simsakna gita nanga. Ia manderang an·ching baksa ong·ani cholrangko ra·naba gnang,” ine TMC-ni dilgipa parakataha.
Niam gri ‘drugs’ badinggipa manderang baksa bilo ong·enggipa manderangni bakrimenganina an·tangni jajrengchakenganiko parakatengon, “Mizoram a·dokni INC MLA saksani depante, rim·ako man·aha aro iako bang·a songbadrangon gataha. Congress MLA Henry Lalremsanga-ni depanteko gong kror 6-ni samrang baksa rim·aha aro unbaksa gitcham MLA Ashok Ahuja-ni depante Arvind Ahuja-koba rim·aha. Iano rim·a man·gipa mandeko an·chingni Chief Minister Conrad Sangma-ni meligipa ineba seaha aro ian angna namen dongtogijaniko ra·baaha. Ian an·chingni Chief Minister, uni jikgipa aro Delhi-ni program-o dongpae bak ra·gipa Henry-ni apsan jachipchanggipa noksa ong·a,” ine Sangma, noksako mesokjole Assembly-na parakataha.
Uni iandake matnanganiko jegalatskaengon, noksao apsan dongaiani gimin mandeko iandake matnanganiara da·oni chasongode namen ra·chakna man·gijani aro kragijani ong·enga ine a·dokni Chief Minister aro NPP-ni national president parakatskaaha.
Manderangni nikanio niksenggiparang ong·e uamang pangnan bang·bea manderangko gronge apsan jachipchangna gita nangrongaia ine talataniko on·angengon, “Mande sakgnini kamrangko nangdimatani aro noksao pangchake mandeko iandake potchipaniara namen kragijani ong·aha,” ine Conrad parakataha.
“Uano maia ong·enga, uni bidingo sakkirang dongna gita nanga indiba uamangni kamrangni gimin anga an·tangde mamingkoba ma·sipaja,” ine Assembly session-ni ja·man a·dokni Chief Minister, kobor ra·timgiparangna aganaha.
Noksao apsan nikaiani gimin mandeko iandake dos galaniara namen kragijani ong·a ine janapatengon, “Ia mande baksa anga jak dongbebegenchimode jinmani mikkangon parak ong·gnokchim aro pilak biaprangon iani giminsa manderang golpotokenggenchim. Iandake ong·genchimode anga mikkangchide manderang baksa jachipchanganiko dontongna nanggnok aro jinma tom·anirangonaba re·anirangko dontongna nanggnok,” ine Sangma aganaha.
Iani bidingo kachari ba police-rang, Conrad Sangma-ni bimingko ra·ahama ineba ua sing·doatengon, “Internet-oniko da·o ua niatgenchimode, bang·a manderangkon gipinrang baksa jachipchanganirangko bang·en nikna man·aigen indiba iandake manderangko apsan noksao nikaiani gimin gipinni kamo jak donga ine matnangaianiara namen kragijani ong·a,” ine Chief Minister parakataha.
