U·IATTIMGIPAONI
TURA: Mongolbar salo, West Garo Hills a·jani SSA unit, World Literacy Day-ko Tura-ni Dakkopgre-o donggipa SMELC-o manidilangaha aro ia salko manianio, poraia dontonggipa bi·sarangko skulrango biming segattaian baksana School Health & Wellness program-o chu·sokgiparangnaba mande ra·pilskaaniko dakangaha.
Ia program-ko ong·atanio Tura Rongkhon-o donggipa College of Teachers Education (B.Ed College)-ni Principal MA Sangma, mongsonggipa sokgipa ong·e bakko ra·angaha aro skulrango gital biming segatgipa bi·sarangna Teaching-Learning Material (TLM)-ko suale on·angan baksana School Health & Wellness program-o sakgittam nambatsranggipa manderangna boksisrangko on·angaha.
Ia tom·anio B.Ed College-ni Principal MA Sangma, jinmana aganprakangengon, adita salrangna skang Shillong-o education official-rang tom·e chanchirimangengon, ia sal somoirango bilsi sokgija an·o dongengani a·selsa skulrango poraiani dongtonganirang batroroenga ine ma·sina man·aha ine parakataha.
Iandake poraianirangko dontonganirang batroroenganina ua mobile phone gita dakgipa kolrangko skatang jakkale rona man·engani gimin matnangataha.
Skulrango skigiparangko skatang absent ong·jachina didiatengon, skigiparangko, mongsongbate primary level-o skigiparangko da·ode dingtangmancha ra·gatgipa application-chi nirokanggnok ine Sangma, mikrakataniko on·angaha.