U·IATTIMGIPAONI
SHILLONG: Bilsi 10-na skang, niam gri drugs ba pekatgipa samrangko badinganina rim·ako man·gipa Mizoram a·dokni mande baksa jak donga ine a·dokni Chief Minister Conrad K Sangma-ko matnange, Assembly-ni Autumn Session-o a·dokni gitcham Chief Minister aro Trinamool Congress (TMC) parliamentary party-ni dilgipa Dr Mukul Sangma-ni agangipa kattarangko Budbar salo, Meghalaya Assembly-ni Speaker Thomas A Sangma ra·galataha.
Mukul Sangma-ni Assembly-o agangipa kattarangko ra·galchina gita dabie a·dokni Deputy Chief Minister aro Parliamentary Affairs Minister Prestone Tynsong-ni Assembly-o mesoke on·angani ja·man, Dr Mukul Sangma-ni Chief Minister-ni kosako matnange agangipa kattarangko Speaker ra·galataha.
Meghalaya Legislative Assembly-ko namgipa bewalrangna a·song gimikon ma·sitoka aro maming sakki gri saksa sakgipinni kosako matnanggrikanirangko dakjana ine Assembly-ni Speaker, a·dokni gitcham Chief Minister Dr Mukul Sangma-ni Assembly-o agangipa kattarangko ra·galataha.
Iani bidingo ua name am·sandie niaha ine talataniko on·angengon, Meghalaya Legislative Assembly-ni Rules of Procedure aro Conduct of Business-ni Rule 279 A-o pangchake, membor skani kosako maming sakki gri matnanganirangko dakjachina ge·etani donga ine Speaker parakataha.
“Rule 304-ni ning·o ia kattarangni gimin membor-rangni chanchirimaniko ra·galna gita Speaker-na bilko on·aha. Uni gimin Rule 304-ni ning·o on·gimin bilrango pangchake Dr Mukul Sangma-ni agangipa kattarangko ra·galenga maina ian Rule 279 A-ko pe·ani ong·aha,” ine Assembly Speaker aganaha.