U·IATTIMGIPAONI
SHILLONG: Batanggimin bilsi bongani gisepo lak 3 ong·nasipile kamrangko private sector-rango nakatatjok ine Meghalaya Chief Minister Conrad Sangma a·kange aganaha.
Shillong-o, CM Elevate-ni a·bachenggipa programo jinmana parakatengon, batanggimin bang·gija bilsirangonin a·dokni GSDP-ba namdapaha ineba Pa Sangma a·kange aganaha.
Kamrang altua ong·ja aro namen ra·biani gnang ine aganengon, mikkangchide bading-chiwalgiparangan a·doko economy-ko chalaigipa bil ong·gen, jeon sorkariode policy-rangko bikotna gita kam ka·ani ari gnang ong·aia, CM aganaha.
Batanggimin bilsi bongani somoio, Sorkari ge 40000-na batpilen self help group-rangko bikotaha, jemangnan kror 500 tangkarangkoba chamataha aroba Sorkari ge 20000 farmers group-koba kuliataha jemangnan kror 400 tangka paisarangko chamataha.
Chief Minister indake talate aganaha je ian, Shillong, Tura ba Jowai pangchakgipa program ong·jawa indiba songadam-nokadamrangoni manderangkoba ia programna dorgasto galanikoba Pa Sangma nangnikaha.
Iana ja·ku de·chakatengon, ia programni ning·o Sorkari sak 20000 bading-chiwalgiparangna kror 300 tangkarangko subsidy on·na miksongenga, CM aganaha.
Ia programni ning·o ming 15 dingtang dingtang scheme-rang donggen aro ian kror 1368 tangkarangko economy-o chanchapatgen, unagreba ge 50000 direct aro indirect jobs ba kamrangko nakatatgen.
Ia on·tisa Tg 4,000 chi manderang bading-chiwalaniko a·bachengna man·gen aro uamangni bading-chiwalanio dakchakaniko on·na gita Sorkari, 35% oni 75% ona kingking subsidy-rangko on·gen.