U·IATTIMGIPAONI
SHILLONG: 2010 bilsioni ia 2023 bilsini September jaona kingking, niam gri drugs ba pekatgipa samrangko badinganina gimik sak 1518 manderangko rim·aha aro ia sak 1518-oni ming 487 case-rangde matchotkujaenga, sak 50-nade raiko on·manaha aro sak 36-kode watpilaha ine Bristibar salo, a·dokni Social Welfare Minister Paul Lyngdoh parakataha.
Meghalaya a·doko pekatgipa samrangko jakkalani aro badingani bidingo VPP-ni MLA Ardent Miller Basaiawmoit-ni sing·anirangna aganchakaniko on·angengmiting somoio Lyngdoh, ia kattarangko aganaha.
Meghalaya a·dokara gipin a·song baksa nangchapgipa a·dok ong·e aro gipin a·dokrang baksaba nangchapgipa ong·e batanggimin bilsirangonin pekatgipa samrangni a·sel manderang bang·a neng·nikanirangko chagrongna nangtokengaha ine janapatengon, “Batanggimin bilsirangode a·dokona bang·gija drugs-rangkosan badingatna man·rongaiachim indiba da·ororode a·doko drugs-rangko bang·en rim·na man·rongenga,” ine Lyngdoh parakataha.
Social Welfare Minister-ni parakatani gitade, niam gri drugs badinggipa manderang pangnan chadamberangkosa nisan donchengronga aro Meghalaya a·dokara lekka porako on·ram ine mingsinggipa biap ong·ani gimin drugs badingenggipa manderang pangnan a·dokni chatro chatrirangnasa drugs-rangko badingna jotton ka·rongengachim.
Skang salrangode drugs ba pekatgipa samrangko East Khasi Hills aro Jaintia Hills a·jarangosa palbatrongaiachim indiba da·ororode drugs-rangko Garo Hills, West Khasi Hills aro Ri Bhoi a·jarangoba rim·na man·rongengaha ineba Lyngdoh parakataha.
Ia sal somoirango niam gri drugs badingenggiparangko aro drugs-rangko bang·en rim·na man·engani gimin ua dingtangmancha Police department aro mongsongbate Anti Narcotics Task Force (ANTF)-ni kamrangkoba mittelpilangaha.