U·IATTIMGIPAONI
AMPATI: South West Garo Hills a·jao Swachhta Hi Seva-ni bak gita Sukrobar salo dingtangmancha program-ko Ampati-o ong·atangenba, Swachh Survekshan Grameen-ni ning·o nambatgipa songni boksisko Sulguri-A songna on·angaha.
Ia program-ko District SBM-G ong·ataha aro ia program-o South West Garo Hills a·jani Deputy Commissioner aro SBM-G-ni Chairman RP Marak, mongsonggipa sokgipa ong·e bakko ra·angenba, Sulguri A songni dilgiparangna tangka aro citation-ko boksis dake on·angaha.
Ia tom·anio SWGH a·jani DC, jinmana aganprakangengon, October-ni 2 tarikona kingking antignina ia Swachhta Hi Seva-ko ong·atenga aro iani ning·o dingtang dingtang program-rangko ong·atenga ine parakangaha.
Sulguri-A songni rongtal an·talaniko rakkianio name dakahani gimin an·tangni kusi ong·chakaniko parakatengon, ian mikkangchi gipin songrangkoba rongtal an·tale dongna didiani gita ong·gen ine Marak parakataha.
Songadam nokadamrango iandakgipa boksisrangko man·namangmangsan rikaigija, rongtal an·talaniko an·tangtangan rakkigiparang ong·na nanga ine didianiko on·angengon, ia Swachhta Hi Seva-ko ong·atengmiting somoio komibeoba antiprako changgnide songtang noktangko rongtal an·talatna nanga ine Marak aganaha.
South West Garo Hills a·jao jabolrangko chimonge galanio neng·nikanirangko man·na nangengani gimin janapatengon, a·jao Municipal Board-ko kuligenchimode ia neng·nikaniko namatna man·genchim ine Deputy Commissioner aganaha.
Ia program-ko ong·atanio dongpae bakko ra·anggipa gipin manderangara, ADC Rezina Ch Marak, PHE-ni Executive Engineer aro SBM-G-ni Member Secretary Raju P Marak, Zikzak-ni BDO D Hajong, SBM-G-ni District Coordinator TA Sangma aro gipinrang ong·a.