U·IATTIMGIPAONI
TURA: Skigipani kamna manderangko seokanio kragipa candidate-rangko kamo seokna man·na gita Assam sorkarini ra·gatgipa niamo pangchake, Meghalaya a·dokoba ‘Special Written Test’-ko a·bachengatchina Garo Hills Youth Organisation (GHYO), School Education & Literacy-ni Director-na sedoataha.
Iani bidingo Education official-na sedoatengon, West Bengal gita dakgipa a·dokrango B.Ed course-rangko dakenggipa chatro chatrirangkode bilsi gimikan songtang noktangosa nikna man·rongaia aro porikkamangmangkosan sena re·angtokaia ine GHYO matnangataha.
“West Bengal a·doko B.Ed course-ko poraienggipa mitam chatro chatrirangde porikkamangmangkosan serongaia indiba class-rangode dongrongja ine bang·a manderangan agantokronga. B.Ed course-rangko dakenggipa chatro chatrirang skigipani kamna class-rango donge skie ra·na nangchongmotgenchimoba West Bengal gita dakgipa biaprango B.Ed course-rangko dakenggipa chatro chatrirangkode bilsi gimikan uamangni songtang noktangosa nikna man·skaa,” ine GHYO-ni president Nazmul Hashan parakataha.
Meghalaya a·doko B.Ed course-ko poraienggipa chatro chatrirangde NCTE-ni dongimin dingtang dingtang niamrangko ja·rikna nangan baksana attendance-ba chu·gimik ong·na nanggenchimoba gipin a·dokrango altuae B.Ed pass ka·bagipa chatro chatrirang baksa susana nangenga aro ian a·dokni chatro chatrirangna namen kragijani ong·enga ineba GHYO-ni president parakataha.
Gipin a·dokrango B.Ed course-ko dakgipa candidate-rangni certificate-mangmangko nie kamo ra·genchimode chatro chatrirangna namen nangchakeaniko ra·bagen ine janapatengon, iani bidingo ta·raken kamrangko niatchina aro skigipani kamna seokanio special written test-ko ra·skachina gita GHYO, School Education & Literacy-ni Director-ko didiataha.