U·IATTIMGIPAONI
SHILLONG: Ma·mong sorkarini ra·gatgipa PM-KISAN scheme-ko Meghalaya a·doko jako ra·e kam ka·anio, niam gita chu·sokatjaha ine CAG-ni report-o parakaha.
Pradhan Mantri Kisan Simman Nidhi (PM-KISAN) scheme-ara game ge·e cha·enggipa manderangko dakchakna gita Direct Benefit Transfer (DBT) mode-ni ning·o tangka paisarangko chipe on·na gita 2019 bilsini February jao ma·mong sorkarini a·bachengatgipa scheme ong·achim aro ia scheme-ni ning·o ia scheme-ko man·na seokako man·gipa manderang, an·tangtangni gama ge·ani kamrangna aro dingtang dingtang nanganirangna bilsio gong 6000/- ka·e uamangni bank account-rango man·na nanggipa scheme ong·achim.
Ia scheme-ni ning·o tangka paisarangko gong 2000/- ka·e bilsio changgittam dake chipatani ong·achim.
Indake ong·engon, CAG-ni report-o parakani gitade, Meghalaya a·doko ia scheme-ni kamrangko ka·anio seoka man·gipa manderangna land holding document ba record-rangko name nipilanirang dongjahachim aro ia scheme-ni niamrangkoba name ja·rikjahachim.
Ia scheme-ni ning·o game ge·e cha·na man·gipa a·arangko man·aniara hectare 6,63,053.07 ong·e 214 percent ong·pilahani gimin ia scheme-o man·na nanggijagipa manderangkoba biming segatahakon ine chanchichipenga.
Scheme-ni namgniko man·enggipa manderangni data-rangkoba unique biometric identification (UBI) baksa department link ka·kuja aro namgniko man·enggipa manderangni data-rangkoba name update aro validate ka·jaha ine CAG parakataha.
Iandake niamrangko ja·rikjahani a·selan ia scheme-ko man·na kragijagipa manderangba man·aha aro scheme-ni ning·o jiksesa sakgnian namgnirangko man·aha, mitam manderangde changgni dake tangkarangko man·aha aro apsan bank account-on scheme-ni tangkarangko baditaba sak manderangna chipataha ine CAG-ni report-o parakataha.
Indake ong·engon, ia scheme-ni niamrangko name ja·rikjahani gimin a·ja ge·antini district agriculture officer-rangchi sandirokanirangko dakenba, taridapna nanganirangko taridapchina gita CAG ku·pattianiko on·angaha.
