U·IATTIMGIPAONI SHILLONG: Meghalaya Energry Corporation Limited (MeECL)-o ong·enggipa tangka paisani gita obostako Meghalaya Pradesh Congress Committee (MPCC)-ni gitcham president aro Umsning-ni MLA Celestine Lyngdoh, ‘cancer’ sabisi man·gipa nokdang baksa toe janapatenba, MeECL-o man·enggipa namjabegipa sabisiko namatpilna gita a·dok sorkari ta·raken ja·kuko de·na nangengaha ine parakataha. “Na·simang MeECL-ko nigenchimode, ian cancer saaniko man·gipa nokdang gita chacha ong·enga. Cancer man·gipa nokdang kangal cholgri ong·gipa nokdang ong·genchimode sanna bananirangko ra·na gita an·tangtangni a·arangko palna nanggen. Sanna bananiko ra·na gita skanggipa uamang a·arangko palgen aro ja·mano tangka paisarang chu·ongjaode a·arangko paldapna nangkugen indiba saa namja ong·ode sagipa mandede siangaignok aro uni nokdangni gam-jinrangba bon·aignok,” ine Lyngdoh aganaha. “Apsan daken, MeECL-naba a·dok sorkari, gong krorni kror tangkarangko on·engachim indiba an·chi ong·an namchipjaenga. Uni gimin sorkari, changsanon ia corporation-ni sabisirangko namatsrangna gita chu·gimik dingtangataniko dakna nangengaha,” ineba Umsning MLA aganaha. MeECL-ko tangatpilna gita a·dok sorkarini jotton ka·ani agre ja·manchakdugaahama ine sing·anina aganchakaniko on·angskaengon, “Sorkarini jotton ka·anirang ja·manchaka ong·ja aro kamrang komiahaba ong·ja indiba MeECL-ko chalaienggipa manderang, baditana kingking kakket ong·e aro name chalaienga, uasa sing·anide ong·enga,” ine Lyngdoh parakataha. “Uni gimin MeECL-na badita tangka paisarangko koros ka·engoba an·ching namgipa biterangko nikna man·chipjaenga,” ineba ua aganaha. Meghalaya a·doko ia chang, re·anggipa February-March jarangonin load shedding ka·aniko dontongkujaengachim aro iani a·sel a·doko songdongenggipa manderang neng·nikanirangko chagrongna nangtokengachim. A·bachengode salon konta 10-12-mangna load shedding-ko ka·achim indiba da·ode salo konta 2 ba konta 3 dake ka·skakuengachim.
