U·IATTIMGIPAONI
TURA: West Garo Hills a·jani a·kawe jolo Selsella-oni Balachanda-ona dakanggipa rama namsrangjahani a·sel re·ruraenggipa manderang neng·nikanirangko chagrongna nangtokenga ine A·chik Students Welfare Association (ASWA) parakatenba, ia ramako ta·raken tarie on·china gita a·dokni Deputy Chief Minister aro PWD (Roads) Minister Prestone Tynsong-na sedoataha.
“Selsella-oni Balachanda-ona dakanggipa rama a·kolrara dake rama jolgimikan nosto ong·ahani a·sel chinga Selsella jolo songdongenggipa manderang namen neng·nikanirangko chagrongna nangtokengaha. Ia ramara Selsella jolo songdongenggipa manderangna mongsonggipa rama ong·e, skulrangchi re·enggipa, office-rangchi re·enggipa, bading chiwalenggipa, sanna bananirangko nangenggipa aro pilaknan namen nangchongmotgipa rama ong·a indiba da·alo ia rama namsrangjahani a·sel ia jolo songdongenggipa manderang re·ruraanirango namen neng·nikanirangko chagrongna nangtokengaha,” ine ASWA-ni president HN Sangma, PWD (Roads) Minister-na sedoatgipa chittio parakataha.
Sangma-ni parakatani gitade, ia ramarang namsrangjahani a·sel ia ramako re·ruraenggipa manderangni gari gorarang nosto ong·ataniko man·na nangenga, songre songabatanio somoirangkoba bang·bate nangenga aro ian Selsella jolrango bading chiwalanirangoba nangchakeaniko ra·baengachim.
Mikkarang waani somoio ia ramako re·ruraenggipa manderangna kenchakna nanganirangba ong·enga ine ASWA-ni president parakataha.
“Uni gimin iandakgipa obostako chel·chakna gita ia ramako ta·raken tarie on·china chinga Selsella jolo songdongenggipa manderang nang·ni department-ko mol·molenga. Jolo namroro silroroaniko ra·bana gitade namgipa rama jal·langrangkoba nangchongmota,” ine Sangma parakataha.
