U·IATTIMGIPAONI
SHILLONG: Meghalaya a·dokni Child Protection Services-o kam ka·enggipa officer-rang aro gipin staff-rang, jabrini dormaharangko man·kujae neng·nikanirangko chagrongna nangtokengaha ine Voice of the People’s Party (VPP) parakatenba, ia officer-rangna aro gipin staff-rangna ta·raken dormaharangko on·china a·dokni Social Welfare Minister Paul Lyngdoh-na sedoataha.
Iani bidingo Social Welfare Minister-na sedoatengon, “Child Protection Service-ni ning·o kamko ka·enggipa officer-rang aro gipin kamrangko ka·enggipa manderang, batanggimin jabrini dormaharangko man·tokkujaenga aro uamang, bi·sarangni namgnina an·tangtangko on·kange kamrangko ka·engoba uamangna maming gipin man·gnirangko on·jaenga,” ine VPP-ni general secretary Ricky AJ Syngkon parakataha.
Koborko man·soani gitade, ma·mong sorkarioniko tangka paisarangko man·sojaengani a·sel Child Protection Service ning·o kam ka·enggiparangna dormaharangko on·na man·jaenga ine janapatengon, ia scheme-ko chalaianio a·dokni nangchakegipa department, maiba dakna nanganirangko chu·soktjaengani a·selsa tangka paisarangko man·jaengakon ine Syngkon parakataha.
“Tangkarangko man·sojaengani a·sel bi·sarang aro kam ka·enggipa manderangba neng·nikanirangko chagrongna nangtokengani gimin iani bidingo ta·raken ja·kuko de·na nangchongmotenga,” ine VPP-ni general secretary, Social Welfare Minister-ko didiataha.
Child Protection Service-ni office-o iandake kamrangko ka·anio chu·sokjaengani a·selan ia office-ko name chalaina gita man·jaenga ineba Syngkon parakataha.
Ia Child Protection Service-ni office-ara, Juvenile Justice (Care & Protection of Children) Act 2015, Protection of Children from Sexual Offence (POCSO) Act, 2012, Prohibition of Child Marriage Act, 2006, Immoral Traffic Prevention Act, 1986 aro uandakgipa niamrangni ning·o bi·sarangna naljokaniko on·na gita 2012 bilsio ma·mong sorkarini a·bachengatgipa scheme ong·achim aro ia scheme-ni ning·o salgro salaramni damchet a·dokrang aro Himalaya-ni damgni a·dokrangnade 90 percent tangka paisarangko ma·mong sorkari chame, 10 percent-kosan a·doktangoni chamna nangaiachim.
Indake ong·engon, Meghalaya a·doko ia Child Protection Service-ni office-ko name chalaijaengani a·selsa ma·mong sorkarioniko tangka paisarangko man·sojaenga ine VPP matnangatenba, iani bidingo ta·raken ma·mong sorkari baksa agangrikatchina a·dok sorkariko didiataha.