U·IATTIMGIPAONI
TURA: Garo Students Union (GSU) Eastern Zone (EZ)-ni election-ko re·baenggipa October jani 20 tariko ong·atna gita saksa Alkullin minggipa mandeko caretaker-ni kamna GSU central executive committee songaha.
Iani bidingo u·iataniko on·angengon, ia caretaker-an GSU Election office-ko songna gita chief election commission-na bimingko GSU-CEC-na ku·pattie on·na gita bilko man·gen aro GSU-ni electoral roll-ko tarina gita GSU constitution-ni niamrangkoba ja·rikanggen ine GSU-CEC-ni president Tengsak G Momin parakataha.
GSU-ni election-ko ong·atkujaskal, ua GSU-EZ-ni seal-rangko jakkalna gita bilko man·gen ineba Momin parakataha.
Indake ong·engon, GSU-EZ-ni election-ko name matchotatna gita chief election commissioner-ni kamo dakchakanirangko on·na, nanggenchimode ua dingtangmancha bimangko songna man·gen ineba GSU-CEC-ni president parakataha.
GSU-EZ-ni election-ko ong·atchina gita eastern zone-ni ning·o donggipa mitam unit-rang dabitokahani gimin GSU-EZ-ni election-ko GSU-CEC-ni president, adita salrangna skang, Williamnagar-o tom·e chanchirimangenba, re·baenggipa October jani 20 tariko ong·atna tik ka·e donangahachim ine nikna man·a.
