U·IATTIMGIPAONI
New Delhi: Chang 5-gipa SDG Summit-ko “Strengthening Economies – Collaboration! Financing! Resilience!” ine pangchakaniko donenba salgnina September 27 aro 28 tarikrango New Delhio ong·atangaha. Ia tom·ani climate change aro environment-ni bidingo u·i-ma·sigiparang baksa Meghalayani Minister in charge, Health aro Family Welfare Department, Agriculture aro Farmers’ Welfare department, Information aro Public Relations department, Law Department Dr Mazel Ampareen Lyngdoh-ba bakko ra·angaha, aro Meghalaya Sorkarini jako ra·e re·mikkangenggipa kamrangko summit-o parakangaha.
Ia SDG summit-o, Minister Ampareen Lyngdoh, “Responsible Endeavours for a Resilient Future”-o pangchake aganangaha. Ua agana; “Meghalaya, 76% buring-bolgrimrangko pattia man· aro hajal 50-na batpilen chiringrang donga. Indakoba, climate-ni dingtanganichi chingni ecosystem-rangna kenchakanirang sokbaaha aro minggipinara game-ge·e cha·anichi rusiatako man·aha. Ia kenchakanirangko warachaksona gita Sorkari dingtang dingtang bol ge·ani programrangko a·bachengataha aro a·songni dal·batsranggipa Payment for Ecosystem Services program-Green Meghalaya-chi bang·a namgni ong·gipa kamrangko ka·enga. Buring-bolgrimrangko ripingna kam ka·enggipa songni nokni manderangna bilsio hectare prako INR 15,000-ko on·enga. Da·o dipet dam 1,500 song-nokrangna 27,000 hectare buring bolrimrangko ripingna dakchakanirangko on·aha” Minister aganaha.
A·dokni game cha·chagipana pangkamgipa kamaiani cholko ra·bana gita re·anggipa January jao, Meghalaya State Organic aro Natural Farming policy-ko a·bachengataha ineba Minister aganaha. Ia policy-ni ning·o game cha·giparangna dingtang dingtang skie on·anirangkoba dakenga.
Ia salgnina ong·atgipa SDG Summit-ko ITC Maurya aro Dr Ambedkar International Centre, New Delhi-o salprakrak dake ong·atangaha, jeon bang·a dingtang dingtang skigiparang bakko ra·tokaha.
Minggipin, Ma·mongni Minister of Petroleum aro Natural Gas, Hardeep Singh Puri, Meghalaya-na Green Ribbon Champions award-ko pakwatangaha, jekon Meghalaya Minister Mazel Ampareen Lyngdoh ra·chakaha.