U·IATTIMGIPAONI
SHILLONG: Re·baenggipa 2024 bilsini Lok Sabha election-o Williamnagar-ni gitcham MLA aro Congress dolni dilgipa Deborah C Marak, Tura Parliamentary constituency-oni susaani cholrang dongenga.
Tura Parliamentary election-rango Purno A Sangma-ni nokdang baksa susagiparangoni Deborah Marak-mangmangsan Sangma-ni nokdangko chena sigipa ong·aiachim maina gipin susagiparangde Sangma-ni nokdang baksa susaanio maming daken sokrikpajahachim ine nikna man·a.
Indake ong·engon, da·o dipet ua Tura Lok Sabha seat-o susana chanchianide dongkuja indiba Congress dolni dilgiparang uko nangnikgenchimode ua susana kusi ong·aigen ine Marak parakataha.
Politics-o pangnande tangka paisarangchi chu·sokna gita man·ja ine janapatengon, “Chinga ku·cholsan ong·e rakbate kamrangko ka·genchimode anga chegipa ong·na man·aigen,” ine Marak parakataha.
Politics-ode salantian dingtanganiko nikna man·aia ine janapatskaengon, Lok Sabha election-o uni cheanide, onbatgipa gadango maikai Congress dol kamrangko ka·soa, unosa pangchakaigen ine a·dokni gitcham Cabinet Minister parakataha.
Shillong parliamentary seat-ni gimin janapatskaengon, da·o ong·enggipa MP Vincent Pala-an election-o susataigen ine Marak parakataha.
Ia bilsini Assembly election-o Meghalaya Pradesh Congress Committee (MPCC)-ni president aro Shillong Lok Sabha MP Vincent Pala-ni amako man·ahani gimin janapatskaengon, ia election-o ua rakbeen kamrangkode ka·ahachim ine Marak parakataha.
Congress dolni gisepo bakgni ong·ahani a·selsa Assembly election-o Congress dol amako man·aha indiba da·o Lok Sabha election-na uamang rakbate kamrangko ka·soskaengaha ineba Williamnagar-ni gitcham MLA parakataha.