U·IATTIMGIPAONI
SHILLONG: Meghalaya sorkarini dingtang dingtang department-rango ka·gualgipa kamrangni bidingo Comptroller & Audit General (CAG)-ni report-ko parakatani ja·man, ia report-o parakatgipa kamrangni bidingo jako ra·e nipiltaina gita Public Accounts Committee (PAC) tariengaha.
PAC-ni Chairman Charles Pyngrope-ni parakatani gitade, CAG-ni mesoke on·anggipa kamrangni bidingo Committee, jako ra·e nipilangna sienga.
Skanggipa committee-ni gita tom·e chanchirimaniko ong·atchenggen ine janapatengon, iani ja·mano nangchakegipa department-ni officer-rangko Shillong-ona re·bae PAC-ni mikkango talate on·china gita somoiko on·anggen ine Pyngrope parakataha.
Ia tom·anirango, Principal Accountant General-ba dongpae bakko ra·anggen ineba PAC-ni Chairman parakataha.
Pyngrope-ni talataniko on·angani gitade, CAG-ni mesoke on·anggipa kamrangko dingtang dingtang department-rang taridapna gita nanggen.
Fisheries department-ni kamko Power department jako ra·a ine batanggimin somoirango CAG-ni parakatgipa kamni bidingo toe janapatengon, ua somoio ia department-rang, an·tangtangni dakgualgipa kamrangko namdapatna gita nangaha ine PAC-ni Chairman parakataha.
Dingtang dingtang department-rangni dakgualanirangko sing·sandie ra·aniara PAC-ni daitoan ong·a ineba ua aganaha.
Name chanchisamsoe kamrangko ka·jahani a·sel aro private company-rangna tangka paisarangko indinari koros ka·ahani a·sel batanggimin adita bilsirangni gisepo a·dok sorkari, gong kror 170-na baten manderangni tangkarangko bon·ataha ine CAG-ni report-o parakahachim ine nikna man·a.