U·IATTIMGIPAONI
TURA: Songadam nokadamrango donggipa manderangni namgnina ma·mong sorkarini ra·gatgipa dingtang dingtang scheme-rang, jekai PMAY, IHHL, MGNREGA aro uandakgipa scheme-rangko ra·na gita mitam official-rang, manderangoniko tangka dabie ra·enga ine Robibar salo, Tura-ni BJP MDC Bernard N Marak, a·dokni Chief Minister Conrad K Sangma-ba badi ka·e sedoataha.
Marak-ni parakatani gitade, adita salrangna skang ua, West Garo Hills a·jani dingtang dingtang block-rangona re·ange kamrangko niangon, ma·mong sorkarini ra·gate on·gipa scheme-rangko ra·na gita mitam official-rang, tangka paisarangko dabie ra·enga ine manderangni badi ka·anirangko ua knabana gita man·aha.
“Ia official-rang, ma·mong sorkarini ra·gate on·gipa scheme-rangna kangal cholgri manderangoniko tangka paisarangko dabie ra·enga aro iandakgipa kamko sorkari bon·atna nangchongmota. Je official-rang iandake tangka dabie ra·anio jak donga, uandakgipa official-rangni kosako BDO-rang rakgipa ja·kurangko de·na nanga aro kangal cholgrirangna, uamangni tangka paisarangko on·pilchina ge·etna nanga,” ine Marak parakataha.
West Garo Hills a·jani dingtang dingtang block-rangona re·ange nianio ua bang·en kam olgrokanirangko aro kam ka·sretanirangko nikna man·aha ine janapatengon, ma·mong sorkarini ra·gatgipa pilak scheme-rangnan da·o Aadhar gitasa tangja paisarangko on·engaha aro bang·bata block-rangon Aadhar seeding-ko matchotahaoba bank-rango Aadhar seeding-kode da·onan matchotkujaenga ine Tura-ni MDC, suk ong·gijaniko parakataha.
Badiaba badiaba block-rangode kam ka·gipa manderang chu·ongjaenga ine janapatskaengon, iandakgipa block-rango kam ka·gipa officer-rang chu·ongjaengani a·sel bang·bata kamrangkon somoi gita matchotna man·jaenga ine Marak parakataha.
“Block ge·antion dam 15-mangni gita gram sevak circle-rang donga indiba gram sevak circle-rangko nirokna gita gram sevak-rang chu·onge dongja aro mitam block-rangode gram sevika (me·chik)-rangsa gram sevak circle-rangko nigopna nange neng·nikanirangko man·na nangtokenga,” ine Marak parakatenba, je block-rangon kam ka·giparang chu·ongjaengachim, uandakgipa pilak block-rangon chu·onga gita kam ka·giparangko donchina Chief Minister-ko didiataha.
Indake ong·engon, dingtang dingtang scheme-ni tangka paisarangko ma·mong sorkari, somoi gitan beneficiary-rangna on·atengoba, a·dok sorkarioni somoi gita tangka paisarangko watjaengani a·sel bang·bata block-rangon grorang bang·e dongkuenga ine Marak parakataha.
