U·IATTIMGIPAONI
SHILLONG: ‘Swachha Hi Seva’-ni ning·o cleaning drive ba jinma rongtalatanirangko BJP-chi dilenggipa ma·mong sorkarini, Robibar salo ong·ataniara namen kragijani ong·aha ine Meghalaya a·dokni Cabinet Minister aro NPP-ni dilgipa Ampareen Lyngdoh parakataha.
Lyngdoh-ni parakatani gitade, Meghalaya a·dok gita dakgipa biaprango songdongenggipa bang·bata manderangan Kristianrangsa ong·e Robibar salkode pangnan Rongtale aro Isolko olakkinasa jakkalrongachim aro Kristianrangni olakkiani salrango iandakgipa program-rangko ong·ataniara namen ra·chakna man·gijani ong·a.
“Sorkarini Robibar salrango ong·atgipa program-rangko manderang manina gita nangja aro iandakgipa program-rango bak ra·na nangja. An·ching jinma rongtalataniko salgipinoba dakna man·aia. Robibar salo iandakgipa program-rangko ong·ataniara kraani ong·ja,” ine Lyngdoh aganaha.
Robibar salrango iandakgipa program ong·ataniko manderang jegalgen ine ma·sioba maini gimin BJP sorkari, Robibar salrango ong·atronga ua ma·sina amja ineba ua aganaha.
“Robibar salo anga an·tangde giljachi re·rongani gimin iandakgipa program-rango bak ra·ja. Anga saksa namen on·kanggipa Catholic Kristian ong·a aro darangba angko Robibar salo kam ka·atna man·jawa,” ine NPP Minister aganaha.
Apsan daken, Voice of the People’s Party (VPP)-ba Robibar salo, jinma rongtalatani program-ko ong·atahani gimin suk ong·gijaniko parakataha aro ian Kristianrangni kosako ja·ku de·aniko mesokanisa ong·enga ine janapataha.
Robibar salo, Meghalaya a·dokni Chief Minister Conrad K Sangma-ko man·chape Meghalaya Democratic Alliance (MDA) sorkarini bang·a dilgiparangan, Jowai-o Reverend Father Ferdinand Dkhar-ko Jowai Diocese-ni Bishop songaniona re·ange bak ra·angtokahachim ine nikna man·a.
