U·IATTIMGIPAONI
SHILLONG: Re·baenggipa 2024 bilsini Lok Sabha election-na pilak dolrangan tarisamsotokengahaon, Shillong Parliamentary seat-oni susana gita gipin dolni manderangba United Democratic Party (UDP)-oni susana gita dorgastorangko galenga.
Sombar salo, UDP-oni koborko on·ani gitade, re·baenggipa bilsini Lok Sabha election-o Shillong Parliamentary constituency-oni susana gita Hynniewtrep Youth Council (HYC)-ni president Robertjune Kharjahrin aro Khasi Authors Society (KAS)-ni president DRL Nonglait-ba UDP-ni tikitna dorgastoko galenga.
Shillong parliamentary seat-oni susana gita a·dokni Cabinet Minister Paul Lyngdoh, UDP-ni general secretary Jemino Mawthoh, KHADC-ni gitcham CEM Titosstarwell Chyne aro UDP-ni vice president PT Sawkmie-ba UDP-ni tikitna susaengachim ine nikna man·a.
Indake ong·engon, UDP-oni koborko on·ani gitade, UDP-ni dilgiparang, songadam nokadamrango donggipa UDP-ni dilgiparang baksaba tikitrangko on·ani bidingo agangrikna jotton ka·enga.
“Da·o dipetde UDP-ni tikitko on·ani bidingo name tik ka·a dongkuja indiba dingtang dingtang gadangrango agangrikkuenga,” ine UDP-oni kobor on·timgiparang parakataha.
UDP-ni tikitko ja·delbatgipa membor-rangna on·china gita mitam dilgiparangde nangniktokenga ine janapatengon, mitam dilgiparangde, politics-o bak donggipa gital membor-rangna tikit on·aniko nangnikskaenga ine kobor on·timgiparang parakataha.
Indake ong·engon, a·dokni gitcham UDP MLA PT Sawkmie-ba, Shillong parliamentary seat-oni susana gita UDP-ni dilgiparang, una tikitko on·genchimode ua susana an·tangko tarimanaha ine parakatskaaha.
Ua batanggimin bilsi 30-na saksa dilgipa ong·e manderangna dangdike on·ahani gimin UDP-ni dilgiparang una cholko on·taigenchimode ua susana kusi ong·aigen ineba Sawkmie parakataha.
