U·IATTIMGIPAONI
TURA: Garo Students Union (GSU) Eastern Zone (EZ)-ni election-ko re·baenggipa October 19 tariko ong·atna Tengsak G Momin-chi dilenggipa GSU Central Executive Committee (CEC)-ni tik ka·aniko GSU-EZ-ni ning·o donggipa regional unit-rang jegalatenba, ia election-ko ong·atna gita dingtang caretaker-rangko songe donangskaaha.
GSU-EZ-ni gitcham dilgiparangna dongimin bilsi bongani term ia bilsini September jaon bon·ahani gimin GSU-EZ-ni gital dilgiparangko seokna election-ko ong·atani bidingo EZ-ni ning·o donggipa dingtang dingtang regional unit-rang, October-ni 2 tariko, Williamnagar-o donggipa GSU-EZ-ni office-o tom·aniko ong·atangaha aro ia tom·anio GSU-EZ-ni election-ko ong·atna Savio M Sangma aro Tatara N Marak-ko caretaker dake songe donangaha ine u·iataha.
GSU-EZ-ni gital zonal executive committee-ko songkujaskal, ia caretaker-rangan GSU-EZ-ni office-ko jako ra·enba, pilak nanga kamrangko ka·anggen ineba ia tom·anio EZ-ni ning·o donggipa regional unit-rang tik ka·e donangaha.
GSU-EZ-ni election-na Williamnagar-o donggipa Rongrenggre Govt Higher Secondary School-ni Principal Sengsrang G Momin-ko chief election commissioner songna gitaba ia tom·anio tik ka·angaha ine eastern zone-ni ning·o donggipa regional unit-rang parakataha.
GSU-EZ-ni election-ko ong·atna gita Tengsak Momin-chi dilenggipa GSU-CEC-ni parakataniko jegalatengon, “Chinga GSU-EZ-ni ning·o donggipa dingtang dingtang regional unit-ni dilgiparang aro Williamnagar Govt College Students Union (WGCSU)-ni dilgiparang, GSU-EZ-ni election-ko ong·atna Tengsak Momin-ni parakataniko raken jegalenga maina uni iandake parakataniara niamni a·palo ong·a aro Tengsak Momin-chi dilenggipa CEC-kode da·o darangba recognize ka·jaha. Uni jako ra·enggipa kamrangko chinga GSU-EZ maming dakeba ra·chakna man·jawa,” ine GSU-EZ-ni ning·o donggipa regional unit-rang parakataha.
 |
ReplyForward
|
