U·IATTIMGIPAONI
SHILLONG: Re·anggipa 2022 bilsini November jao, Mukroh songo Assam police-rangni skatang goanichi adita sak manderang siangna nanggipani bidingo judicial inquiry dakaniko bon·ate, Central Bureau of Investigation (CBI)-na pakwate on·skana Meghalaya aro Assam sorkarirang tik ka·ahani gimin United Democratic Party (UDP), kusi ong·aniko parakataha.
Re·anggipa Sonibar salo, a·dok damgnini chief minister-rang, Guwahati-o tom·e chanchirimengmiting somoio, Mukroh songo ong·gipa a·selko sandirokna gita CBI-na pakwate on·skana tik ka·angahachim ine nikna man·a.
Ia a·selni bidingo judicial inquiry commission-chi sandirokaniko bon·atna tik ka·aniko parakatengon, ia a·selni bidingo sandirokanio Meghalaya official-rang, Assam judicial commission baksa bakrimaniko on·jaha aro Assam official-rangba, Meghalaya commission-ni hearing dakanio bak ra·skajaha ine Assam a·dokni Chief Minister Himanta Biswa Sarma talataniko on·angahachim.
“Ia a·selni bidingo Assam aro Meghalaya a·dokni commission-rang sandirokna man·jaenga ong·ode CBI-na pakwate on·on nambatgipa ong·enga aro ian darangnaba mikkang niteani dongjawa,” ine ia a·selko CBI-na pakwate on·skana tik ka·ahani gimin UDP-ni general secretary Jemino Mawthoh parakataha.
Ia a·sel ong·anio songni manderang so·otako man·ahani gimin aro dolgnini gisepo mikbu miknenggrikaniko ra·baahani gimin ia a·selko name sandirokna nangchongmota ineba Mawthoh aganaha.
“Ia a·selko sandirokanio somoi ra·chae dongode maming namgnirangko man·jawa. Uni gimin a·dok damgnini judicial commission-rang, sandirokanio chu·sokgipa ong·jahaode aro ia a·selko a·dokni damgnini CM-rangan CBI-na pakwatna tik ka·aha ong·ode, ian a·dok damgninan aro dolgni jatrangnan nambatgipa ong·gen. Sima jolrango maimancha ong·enga an·ching kakketko ma·sie ra·na nangenga,” ine UDP-ni general secretary aganaha.
