U·IATTIMGIPAONI
TURA: Assam-oni South Garo Hills a·jaona dakanggipa National Highway (NH-62) ramako tariani kamrang ka·sindugaengani gimin A·chik Holistic Awakening Movement (AHAM) suk ong·gijaniko parakatenba, ia ramako ta·rake tarichina gita a·dokni Chief Minister Conrad K Sangma-na sedoataha.
AHAM-ni parakatani gitade, ia Dudhnoi-Rongjeng-Baghmara-Dalu ramara Garo Hills-ni mongsongbatgipa ramarangoni dilsa ong·e ia ramako tarianichi Garo Hills-o bading chiwalanirangko tang·doatan baksana namroro silroroaniko ra·baani cholrang ong·engachim indiba ia ramako taria matchotchipjaengani a·sel ian ramako re·ruraenggipa manderangna neng·nikanirangko on·an baksana Garo Hills-o bading chiwale cha·enggiparangnaba noksan ong·aniko ra·baani gita ong·engachim.
“Ramako tarianio dingtang dingtang neng·nikanirang donga ine anga an·tangba ma·sia indiba ia ramako tarianio indita somoirangko ra·aniara namen ra·chakna man·gijani ong·engaha. Ia ramako tarina gita ma·mong sorkari tangka paisarangko chamataha ine parakataoni da·o bilsisa batpilengaha indiba kamrangko nigenchimode da·alonan maming ong·srangkujaenga. PIR report-o parakani gitade, da·alona kingkingan detailed project report (DPR)-koba niengkua,” ine AHAM-ni president Georgeprince Ch Momin, Chief Minister-na sedoatgipa chittio parakataha.
Ia rama tariani kamko somoi gita matchotatjaengani a·sel bading chiwalanirango noksan ong·atako man·asan ong·aigija garirangni re·ruraanirangko neng·nikanirangko chagrongna nangtokenga, songo noko bading chiwale cha·enggiparangnaba nangchakeaniko ra·baenga aro uandakgipa dingtang dingtang neng·nikanirangko chagrongna nangtokengaha ineba Momin parakataha.
Ia ramako tariani bidingo jolo songdongenggipa manderangnaba maming u·iatanirangko on·ani dongja ineba AHAM-ni president, suk ong·gijaniko parakataha.
Kamrangko ta·raken niatchina gita Chief Minister-ko didiatengon, maini a·sel kamrang ka·sinengachim, uarangni bidingo am·sandienba jinmana talataniko on·china Momin dabiangaha.
