U·IATTIMGIPAONI
SHILLONG: Assam aro Meghalaya a·dokni simarango songdongenggipa manderangko warachakna gita Meghalaya Police-o sipairang chu·ongjaengani gimin MLA-rangna aro election-rango amako man·gipa politician-rangna sorkarini on·enggipa personal security officer (PSO)-rangko watatskachina Voice of the People’s Party (VPP), a·dok sorkariko didiangaha.
VPP-ni ku·wattimgipa Batskhem Myrboh-ni aganani gitade, sima jolrango chel·chakanirangko on·na gita Meghalaya police-o sipairang chu·ongjaengoba a·dok sorkari, maming kenchakna nangani gri ong·gipa politician-rangnasa PSO-rangko on·e roskaengachim.
Assam aro Meghalaya a·dokni simarango nirokna donako man·enggipa a·dokni police-rangna chu·onga gita silchidarerangko on·jaenga aro sipairangkoba chu·onga gita on·jaengani a·sel police-rang bilake kamrangko ka·na man·jaenga ine Barato-Mukroh constituency-ni MDC Aiborlang Shadap matnangatani ja·man, MLA-rangna on·enggipa PSO-rangko sima jolrango chel·chakna gita watatskachina VPP dabiangaha.
Simarango nirokna donatako man·enggipa police-rangna nanga gita silchidarerangko on·jaengani gimin aro chu·onga gita sipairangko on·jaengani gimin an·tangni suk ong·gijaniko parakatengon, “Simarango donatako man·gipa sipairang namen bilgrigiparangsa ong·a aro iana anga an·tangan kratchaa,” ine Shadap aganahachim.
Simarango nirokenggipa police-rangko Meghalaya sorkari, ma·gri pagrirang gitasa jakkalenga ine matnangatengon, simarango nirokna donatako man·gipa Assam-ni police-rangde nanga gita silchidarerang dongani gimin pilak obostarangkon chagrongna gita man·enga ine Shadap parakataha.
Iani bidingo toe janapatengon, batanggimin jasana Lapangap-o donatako man·gipa Lumshnong-ni police battalion-rang, gol·dik aro danilrangkosan jakkalna gita man·paenga ine Shadap parakataha.
Assam baksa tosusagenchimode simarango donatako man·gipa Meghalaya police-rangde namen komibata ine janapatskaengon, Saba, Mukroh aro Barato-ode Meghalaya sorkari, chu·gimik silchidarerang baksa police dolrangko donna gita nangachim ine Shadap parakataha.
Sima jolrango songdongenggipa manderangko nambate nirok sandina man·na gita ia jolrangosa police outpost-rangko bang·bate donatna nanga ineba Barato-Mukroh MDC dabiangaha.