U·IATTIMGIPAONI
TURA: Durama Association of Music & Arts (DAMA)-ni PRIME Meghalaya baksa nangrime jaskuna ong·atenggipa Prime Music Incubation-ni Grand Finale ba bon·kamgipa program-ko re·baenggipa October-ni 14 tariko, Asanang kal·chakramo ong·atenga.
DAMA-ni general secretary Bryan Marak-ni u·iatani gitade, git ring·anio aro doka dam·anio changgipa sapgipa manderangko sandina gita ia Prime Music Incubation-ko ong·ataha aro ia jaskuna ong·atgipa program-o sak 18 changgipa sapgipa manderang, an·tangtangni changa sapanirangko a·gilsakna mesokna gita taridapna cholrangko man·aha.
Ia Grand Finale-ko ong·atanio, seokako man·gipa manderangni gisepo susagrikanirangko dakangkugen aro iano chegiparangna boksisrangko on·ani donggen ineba Marak parakataha.
Indake ong·engon, ia Prime Music Incubation-ni Grand Finale-o Garo Hills-ni mingsinggipa Nokpante, Riprap, Da Suraka aro Nagaland a·dokoni Abdon Mech dolrangba gitrangko ring·e manderangko an·saoatanggen.
