U·IATTIMGIPAONI
BAGHMARA: South Garo Hills a·jani sorkari officer-rangko kakket aro bebeo, manderangni namgnina kamrangko ka·angkuchina gita Budbar salo, Siju-Rongara-ni MLA aro a·dokni Education Minister Rakkam A Sangma, ma·mong aro a·dok sorkarini ra·gatgipa dingtang dingtang scheme-rangko nipilna gita Baghmara-ni Circuit House-o tom·aniko ong·atanio didianiko on·angaha.
Ia tom·anio South Garo Hills a·jani Deputy Commissioner S Awasthi, ADC-rang, BDO-rang aro dingtang dingtang department-ni officer-rangba bakko ra·angtokaha.
Sorkari officer-rangko on·kangani gnang, kakket aro bebeo manderangna dangdike on·china didiangengon, ma·mong aro a·dok sorkarini ra·gatgipa scheme-rangara a·jao songdongenggipa manderangni namgnina ra·gatgipa scheme aro project-rangan ong·ani gimin kamrangko somoi gita name chu·sokatna nanga ine Sangma didiangaha.
Education department-o chagrongna nangenggipa neng·nikanirangko, MGNREGA-ni bill-rangko gamani aro uandaken dingtang dingtang scheme-ni kamrangko chu·sokatanio chagrongna nangenggipa neng·nikanirangko ma·sie ra·na gitasa ia salo ua tom·aniko ong·ataha ineba Sangma parakataha.
South Garo Hills a·jao tarienggipa rama jal·langrangko manderangni namgnina, re·baenggipa February jana skangan matchotatna gita jotton ka·chinaba Sangma, PWD officer-rangko ge·etangaha.
Ia tom·anio dingtang dingtang department-ni officer-rang, an·tangtangni chu·sokatna man·enggipa aro kamrangko chu·sokatanio chagrongna nangenggipa kamrangni bidingo Education Minister-na agan-talate on·angtokskaaha.
