U·IATTIMGIPAONI
TURA: Rikman G Momin-ko Bharatiya Janata Party (BJP)-ni gital state president songanio BJP-ni ning·o darangba jegalgiparang dongja ine Budbar salo, Tura-ni BJP MDC Bernard N Marak, talataniko on·ataha.
Momin-ni gital state president ong·e kamko jako ra·ani somoio BJP-ni MLA-rang aro MDC-rangko man·chape pilak dilgiparangan BJP office-o dongpae bakko ra·angtokaha ine janapatengon, iani bidingo songbadrango tol·e kobor on·na jotton ka·gipa manderangara BJP-ni ning·o bak dakaniko ra·bana jotton ka·anisan ong·aia ine Marak parakataha.
“Chinga Rikman-ko state president ong·e man·na namen kusi ong·bea aro indita bilsirangni ja·man pilak dilgiparangni mikkangon kusi ong·aniko nikna man·taiaha. Kamtangko watangenggipa gitcham state president-ba gital state president-ko man·e kusi ong·aha aro BJP-ni office-o gital president-ko rimchaksona gita pilakan kusi ong·e sokbatokaha. Meghalaya-o BJP-ko songchengaoni skanggipa changna A·chik dilgipako da·alo president songahani gimin Garo Hills-ode manderang kusi ong·batenga,” ine Marak parakataha.
Rikman Momin-ko rimchaksona aro una chakpaaniko on·na re·bagipa pilak manderangan kusi ong·gipararasa ong·ani gimin uko state president songanio darangba kusi ong·gija ong·jawa ineba Marak parakataha.
“Momin-ko state president songanina saoba kusi ong·jaenga ong·ode uan tol·e kattarangko aganachi dilgiparangni gisepo aro BJP-ni ning·o ma·sisretgrikaniko ra·bana jotton ka·enggipa opposition camp-onisa ong·gen,” ine Tura-ni BJP MDC talataniko on·angaha.
A·chik dilgipako state president songaniara A·chik a·songna mikkim rasongko ra·baaniba ong·aha ine janapatengon, A·chik dilgipako state president songahani gimin ua dingtangmancha ma·mongni BJP dilgiparangko mittelpilataha.