U·IATTIMGIPAONI
TURA: Adita salrangna skang, Bajengdoba Police Station-o FIR ka·ako register ka·na jechakahani gimin Bajengdoba police station-ni officer-in-charge (OC)-ni kosako Tura Rongkhon Songgital-oni saksa Tarseng Ch Sangma minggipa mande, Meghalaya a·dokni Director General of Police (DGP)-na badi ka·doangaha.
North Garo Hills a·jani Akemgre songo matchotgimin kamna bangki dongenggipa bill-ko gamna gita tangka dabiaha ine matnangenba, Bajengdoba PHE-ni SDO Kedia G Momin-ni kosako ua FIR ka·doangahachim ine nikna man·a. Indake ong·genchimoba, ua somoio uni FIR ka·ako Bajengdoba police station-ni OC, register ka·na jechakaha ine Sangma matnangataha.
Indake ong·engon, uni FIR ka·ako register ka·na jechakahani gimin ja·mano ua Bajengdoba police station-ni OC-ni kosako DGP-ni office-o badi ka·doangenba, kosako janapgimin SDO-ni kosako FIR ka·na gita ia OC-na ge·etaniko on·china didiatahachim indiba da·alonan iani bidingo maming ja·ku de·anirang dongkujaenga ine Sangma matnangataha.
Uandaken da·o ua ia OC-ni kosako a·dokni DGP-na badi ka·doatskaaha.
