U·IATTIMGIPAONI
SHILLONG: Jerusalem songjinmaona re·ange Israel a·songo jachange dongna nangenggipa sak 27 manderang, India sorkarini ning·o donggipa Ministry of External Affairs (MEA) aro Indian Mission-ni rakbee kamrangko ka·anichi da·o sima ari gita Egypt a·songona tom·tome re·ongkatangna man·aha ine Robibar attamo, a·dokni Chief Minister Conrad K Sangma parakataha.
Palestine a·songni Hamas bobil dol, Israel a·songko chadrapna a·bachengatani ja·man a·song damgnini gisepo dinggrikanichi Israel a·songo so·sojengjeng ong·anirangko nikna man·engachim aro uandaken adita salrangna skang Jerusalem songjinmaona re·anggipa Meghalaya a·dokni sak 27 manderangba ua biapon jachange dongna nangtokengachim.
Israel a·songo jachange dongna nangenggipa sak 27 manderangko tom·tome Meghalaya a·dokona rimbapilna gita a·dok sorkari, ma·mongni External Affairs Ministry baksa agangrikenga ine Sonibar salosan Chief Minister parakatahachim.
“Angni gital koborko man·soani gitade, India sorkarini External Affairs Ministry aro an·chingni Indian Mission-ni rakbee kamrangko ka·anichi, so·sojengjeng ong·enggipa Israel a·songo jachange dongna nangenggipa sak 27 manderang da·o maming a·sel nanga gri, sima ari gita Egypt a·songona re·ongkatbana man·aha,” ine Sangma, social media-o parakataha.
Sonibar pringo, Gaza-oni Hamas bobil dol, Israel a·songko chadrapanichi sak 40 baten manderang so·otako man·tokahachim aro sak 700-na baten saknaanirangko man·na nangahachim.