U·IATTIMGIPAONI
TURA: South Garo Hills a·jani Rugapara Health Sub-Centre ba Health & Wellness Centre-o kuturirang chu·onga gita dongjani a·sel manderangna sanna bananirangko on·anio neng·nikanirangko chagrongna nangtokenga ine A·chik Holistic Awakening Movement (AHAM) parakataha.
AHAM-ni general secretary Clinton Marak-ni parakatani gitade, Rugapara jolo songdongenggipa manderangni badi ka·aniko man·soenba, uamang Sonibar salo, Rugapara sub-centre-ona re·ange nieon, ia sub-centre-o kuturi ge·gittamsan dongaia ine nikna man·aha.
“Sub-centre-o kam ka·enggipa manderangni chingna aganani gitade, sub-centre-rango labour room, an·o donggipa me·chikrangna ANC room, Immunisation room, OPD room, Laboratory room aro Transit home dongna gita nangachim. Indake ong·genchimoba, chingni ia sub-centre-ko re·ange nianio nikbaani gitade, ia sub-centre-o namgipa toilet-rangba dongja, bijoliko name connect ka·e on·aniba dongja aro chirangba dongja. Iarang health centre-o kam ka·enggipa manderangnasan ong·aigija saenggipa manderangnaba nangchongmotgiparangan ong·achim,” ine Marak parakataha.
Ia jolrango donggipa dam 34-na baten songrang, Rugapara health centre-o sanna bananirangko ra·na pangchaktokenga ine janapatengon, ia health centre-o kam ka·giparangnasan ong·aigija saenggipa manderangnaba nangenggipa cholrangko on·genchimosa songni manderangna namgipa sanna bananirangko on·na man·gen ine AHAM-ni general secretary parakataha.
