U·IATTIMGIPAONI
TURA: Batanggimin antionin mikkarang waangani ja·man Robibar attamo, Tura-oni Dalu-ona dakanggipa National Highway (NH-51) rama naptomangaha.
West Garo Hills District Administration-ni u·iatani gitade, ia rama gita gari gorarang re·nade man·kuenga indiba Jenggitchakgre songo ia rama naptomangahani a·sel, re·ruraenggipa manderang adita neng·nikanirangko chagrongna nangtokengaha.
Ia NH-51 ramako bilsi bongana skangan tarina a·bachengatahachim indiba da·alonan ia ramako taria matchotkujaengachim.
Ia ramako tarichenggipa contractor, km 50-mangna tariani ja·man kamko watgalaha aro uandaken da·o gipin dolsa ia ramako tariengahachim ine nikna man·a.
Indake ong·engon, Robibar attamo Tura-oni Dalu-ona dakanggipa rama, Jenggitchakgre song sambao dal·bee naptomangaha aro da·o ia ramani bakko gari bolpraksan re·na gita man·enga ine songni manderang u·iataha.
Ia ramako tarikujaskal, naptomanggipa ramani bakko champenge donatchengaha ineba kobor on·aha.
Iani bidingo PWD (Roads) department-o sing·sandiaton, da·o dipet ia ramako NHIDCL-sa jako ra·e tariengani gimin uamang iani bidingo name kobor man·kuja ine parakataha.
