U·IATTIMGIPAONI
SHILLONG: Meghalaya a·doko aro mongsongbate songadam nokadamrango, dingtang dingtang sorkarirang, lekka porani gadangko tang·doatna man·jaenga ine United Democratic Party (UDP)-ni general secretary Jemino Mawthoh suk ong·gijaniko parakataha.
Skangode Shillong-ko bida budi on·chakram ine mingsing minggamani gimin salgro salaram a·dokrangonikosan ong·aigija a·songni gipin biaprangonikoba chatro chatrirangko salbarongachim ine gisik ra·atpilangengon, a·dokni skotong Shillong songjinmao rang·san lekka porani gadang tang·onangahani gimin Mawthoh suk ong·gijaniko parakataha.
“Lekka porako tang·doatna gita sorkari, gisik on·bate korosrangko ka·na nangenga. Meghalaya a·doko skul nokrang aro dingtang dingtang nanganirangko chu·sokatna nangenga,” ine ua aganaha.
Sorkarini report-o parakgipani gimin janapatengon, a·doko aro mongsongbate songadam nokadamrango donggipa skulrango da·o poraienggipa bi·sarang namen komiengaha ine UDP-ni general secretary parakataha.
“An·ching lekka porako tang·doatna aro bi·sarangko aro uamangni ma·a paarangkoba skulrangona re·bachina didina nangnikenga indiba skulon bi·sarangna nangchongmotgipa cholrang, jekai asongchakani, namgipa skul nok aro uandakgiparangko on·na man·jaenga ong·ode maikai bi·sarangko lekka porao gisik nangatna man·gen? Ia gimik cholrang chu·onga gita donggenchimosa bi·sarangko skulrangchi salbana man·gen,” ine Mawthoh aganaha.
Skulrango skigiparangni gimin janapatskaengon, “Maini gimin skigiparang changni chang ramarangona re·ange jingjengatanirangko dakna nangenga? Skigiparangnan dormaharangko name on·na man·jaenga ong·ode maikai uamangko gisiko nange kam ka·atna man·gen?” ine UDP-ni general secretary sing·doataha.
