U·IATTIMGIPAONI
SHILLONG: 2015-2016 bilsirango Garo Hills Autonomous District Council (GHADC)-na ma·mong sorkarini chamatgipa tangka paisarangko jakkalsretanina GHADC-ni gitcham CEM, gitcham secretary aro da·o ong·enggipa MLA Sanjay A Sangma baksana sakgipin contractor Dolrich D Sangma-ko man·chape gimik sak 12 manderangni kosako Meghalaya Lokayukta-ni charge sheet ka·aniko jegale ia manderang da·o gital dake kachario ijahar ka·taina tik ka·angaha.’
Kingstone Bolwari-ni parakatani gitade, GHADC-ni gitcham Deputy CEM Augustine R Marak, gitcham CEM Denang T Sangma, Brilliant R Sangma, Dipul R Marak, Kurosh R Marak, Winnison Ch Marak, Dolly K Sangma, Bhupen Hajong, Sukaram K Sangma aro gitcham principal secretary Hewingson A Sangma, Lokayukta-ni charge sheet ka·ani kosako gital dake ijahar ka·na gita uamangni gitcham case-ko ra·pilaha.
Tura-o gong 6,01,31,100 ong·gipa Member Hostel-ko rikani project-ko matchotjahani gimin Mahendraganj constituency-ni da·o ong·enggipa MLA Sanjay A Sangma aro gipinrangni kosako saksa Kingstone Bolwari Sangma minggipa mande, Lokayukta-na badi ka·doangahachim ine nikna man·a.
Ia tangkarangara, Schedule Tribe a·jarango namroro silroroaniko ra·bana gita 2015-16 bilsirango Central Plan Scheme-ni Special Assistance-ni ning·o ma·mong sorkarini chamatgipa gong kror 100.71-ni bak ong·achim.
Iani bidingo badi ka·anina preliminary inquiry-ko dakon, ia project-rangko chu·sokatanio tangka paisarangko jakkalsretaha ine nikenba iani bidingo ning·tubate sandirokchina Lokayukta ge·etaniko on·angahachim.
Ning·tubate sandirokchina ge·etaniko man·ani ja·man, Lokayukta Inquiry Wing-ni Member Anil Sangma, sandirokaniko dakenba Lokayukta-na chu·gimik report-ko on·ataha aro uni investigation report-o pangchake GHADC-ni gitcham MDC-rang, contractor-rang aro GHADC-ni gitcham official-ni kosako Lokayukta, charge sheet-ko ka·ahachim.
