U·IATTIMGIPAONI
TURA: Ta·rake banggriani somoirango dakna nanggni aro dakchakanirangko on·na gita Bristibar salo, Meghalaya a·dok gimikon Mock Drill ba dake nianiko ong·atangaha aro uandaken ia mock drill-ko Garo Hills-ni dingtang dingtang biaprangoba apsan daken ong·atangaha.
Ia Mock Drill-ko New Delhi-o donggipa National Disaster Relief Fund (NFRD) baksana District Disaster Management Authority (DDMA)-rang nangrime ong·atangaha aro Tura-oba ia mock drill-ko banggrianio kenchakna nangbatgipa dambonga biaprango ong·atangaha.
Mock drill-ko ong·atanio district official-rang, Civil Defence, MPRO, Police, Health, Fire & Emergency Services, Volunteer-rang aro dingtang dingtang department-rangba bak ra·angaha.
Mock Drill-ko ong·atani ja·man dingtangmancha Tura-ni Deputy Commissioner (DC) office-o tom·aniko ong·atangaha aro ia tom·anio West Garo Hills a·jani Deputy Commissioner Jagdish Chelani, ADC DBG Momin, District Disaster Management Officer James D Sangma, gitcham IAS Officer HB Marak aro dingtang dingtang officer-rangba bak ra·angaha.
Apsan daken, North Garo Hills a·jaoba ia Mock Drill-ko Resubelpara Community Health Centre, Chibagok, Belpara Petrol Pump, Dekachang Bazar aro Resubelpara-ni RMSA School-o ong·atangaha aro ia mock drill-o dingtang dingtang department-rang aro volunteer-rang bakko ra·angtokaha.
South Garo Hills a·jaoba ia Mock Drill-ko Baghmara-ni Rangku Memorial Secondary School, Bolsal A·ding, Baghmara Civil Hospital aro Baghmara Municipal Shopping Complex-o ong·atangaha aro ia mock drill-o dingtang dingtang department-rang aro volunteer-rang bak ra·angengon, banggrianio saknaa man·gipa aro sianggipa manderangni manggisirangko hospital-rangona ra·ruraani aro sanna bananirangko dake niangaha.
Indake ong·engon, South West Garo Hills a·jaoba ia mock drill-ko 7.2 magnitude-o banggriani gita ong·atangaha aro ia mock drill-ko South West Garo Hills a·jani DDMA, SDMA-ni ning·o dakdilangaha.
Mock drill matchotani ja·man jinmana talate on·na gita dingtangmancha tom·anikoba ong·atangaha aro ia tom·anio South West Garo Hills a·jani Deputy Commissioner RP Marak, Revenue & Disaster Management-ni ADC RZD Shira aro dingtang dingtang official-rang bak ra·angenba, banggriani aro uandakgipa rang·gitik a·sel ong·ani somoirango dakna nanggni kamrangko agan-talate on·angaha.
