U·IATTIMGIPAONI
TURA: Armed Forces ba dingtang dingtang sipai dolrango kamrangko ka·ani bidingo agan-talate on·na gita coaching-cum-career guidance program-ko re·anggipa October 11 tarikoni 13 tarikona Selsella C&RD Block-ni ning·o donggipa Narangbari-o ong·atangaha.
Ia coaching-cum-career guidance program-ko West Garo Hills a·jani Deputy Commissioner (Planning) office-ni gita ong·ataha aro ia program-ko dingtangmancha Garo Hills-ni chadamberangna sipai dolrango janggi tangani cholrangko dake ra·china didina aro cholrangko mesoke on·na gita ong·atangaha.
Ia career guidance program-ko a·bachengatanio West Garo Hills a·jani Additional Deputy Commissioner aro District Planning Officer WRG Momin, mongsonggipa sokgipa ong·e, program-o bak ra·anggipa chadamberangna aganprakangengon, sipai dolrango kamrangko ka·ani bidingo aro maikai sipai dolrango kam ka·anichi jolni chadamberangna namgni ong·genchim, uarangni gimin aganangaha.
Ia salgittamna ong·atanggipa program-o Home Affairs Ministry-ni ning·o donggipa Central Armed Police Force (CAPF) aro Defence Ministry-ni ning·o donggipa Indian Army-rango kamrangko ka·ani cholrangni bidingo dingtang dingtang official-rang, jolni chadamberangna agan-talate on·angaha.
Ia coaching-cum-career guidance program-o agan-skie on·anggipa manderangara, 120 Bn CRPF-ni Officiating Commandant Puroshottam Joshi, Shillong-o donggipa Indian Army-ni RMO Venkat Reddy, 120 Bn CRPF-ni Inspector Rajiv Sarkar aro gipinrang ong·a.
