U·IATTIMGIPAONI
SHILLONG: Meghalaya a·dok gimikon rama jal·langrangko tarianirang namjaengani a·sel ramarang ta·raken nosto ong·pilengani gimin, rama tarina dongimin niamrangko ja·rikjaenggipa contractor-rangko ‘black list’ ka·china ba kamna kragijagiparang ine segatchina Gambegre constituency-ni Congress MLA Saleng A Sangma, a·dok sorkariko didiangaha.
Adita salrangna skang, Tura-oni Dalu-ona dakanggipa NH-51 ramani Kherapara jolo naptomanggipani gimin janapatengon, ia ramako dongimin niamrang gita tarijaenga ine ua a·bachengonin aganahachim ine Sangma parakataha.
“Ramarang nosto ong·ani gimin an·ching pangnande wachi kariko matnangna man·jawa. An·ching iano pilak karirangnasa ramarangko tarienga aro iano maming chi banani gri aro a·arang rurongani gri maikai ramarang indita ta·raken nosto ong·na nangenga?” ine Congress MLA sing·doataha.
A·bachengo uni aro engineer-rangni agananirangko NHIDCL knachakjaha ine an·tangni suk ong·gijaniko parakatengon, Meghalaya a·doko National Highway-rang, PMGSY ramarang ba Shillong songjinmani ramarangba ta·raken nosto ong·pilaia ine Sangma parakataha.
Manderangni kajina gamenggipa tangka paisarangde indinsa bon·aienga aro iana saobade daiko ra·na nangchongmota ine janapatengon, niam gita kamrangko ka·gijagipa contractor-rangni kosako ja·kurangko de·genchimosa aro uamangko ‘black list’ ka·genchimosa contractor-rang kamrangko nambate ka·na gisiko nanggen ine Gambegre constituency-ni Congress MLA parakataha.
