Kenjagokjachina indiba simsakbatchina Health Minister didiata
U·IATTIMGIPAONI
SHILLONG: Meghalaya a·doko da·o dipet gimik sak 44 manderang dengue sabisiko man·aha aro sabisiko man·gipa manderangoni bang·batan Garo Hills-o ong·a ine kobor on·aha.
Koborko on·ani gitade, da·o dipet a·dok gimiko sak 44 manderang dengue saaniko man·aha aro uamangoni saksade siangaha.
Iani bidingo u·iataniko on·angengon, a·doko songdongenggipa manderangko kenjagokjachina indiba an·tangtangna simsakbatchina gita a·dokni Health Minister Ampareen Lyngdoh didiataha.
Ru·ute fever saaniko man·genchimode porikkarangko ra·e nanga gita sanna bananirangko ra·na, sepangbatgipa health centre-rangona re·angchina gitaba Health Minister, a·doko songdongenggipa manderangko didiataha.
Koborko on·ani gitade, Bristibar saloba dengue-na sak 7 manderangko porikka ra·e niaha aro uamangoni sakgnide dengue-na positive ong·aha.
Dengue man·e sianggipa mande saksani gimin janapatengon, ia mandeara West Garo Hills a·jaoni ong·a aro uko dengue man·ani gimin hospital-ona ra·bae sannaniko on·engachim indiba ua rasong grie siangna nangaha ine Lyngdoh parakataha.
“Da·o dipet chinga dengue sabisini batroroaniko champengna man·enga aro je manderangan dengue man·ahachim, uamangna nanga gita sanna bananirangko on·na man·enga. October-ni 3 tarikoni Bristibar salona kingking dengue man·giparang sak 44 ong·aha aro iana agrede batangjawaha ine chinga ka·dongenga. Ian chirang banani a·sel aro mikkarang waangahani a·selba ong·na man·aia,” ine ua aganaha.
Pilak a·jarangon, dengue sabisina dongimin niamrangko ja·rikchina gitaba Health Minister mikrakataniko on·ataha.
