U·IATTIMGIPAONI
Tura: NEHU Tura campus-o saksa chadambeko kragija ragging ka·ani mamlao, duko ga·akgipa chadambean Nagaland-o ‘Zero’ FIR-ko segataha, indake ia mamlako West Garo Hills Police, am·sandianggen.
October 8 tariko Tura campus-ni Arbella Hostel-ni sakbonga sakdok senior-rang Agri Business Management-ni 1st Sem student-ko uni nokdringoniko okamate ganding-chindingko okmilongate chrokataha. Ragging ka·ako badi ka·a ong·ode namjawa ineba ka·mikkenataha.
Ragging ka·mitingo light ba bijoli dongjani gimin mobile phone-chi ragging ka·ako record ka·aha aro dos dakgiparang andalani gimin an·tangtangko donnuna cholko man·aha.
Ragging ka·a man·gipa student, an·tang baksa iandakgipa obosta ong·ako chakna man·jae grape, hostel-oni ong·kate songtang-noktang Nagaland-ona katangpilaha.
A·sel ong·ani ja·man NSU, badi ka·aha. Tura campus-ni NEHU official-rang, duko ga·akgipani badi ka·ani ja·man mamlako sandiaha, indiba duko ga·akgipa student, hostel-oni katangani gimin dos dakgiparangko u·ina man·kujaenga. Iarangni gisepo university-ko ia mamlako donnuna jotton ka·ani gimin matnangtokaha.
Campus in-charge, Sujata Gurudev-ni aganani gita, ia mamlako sandina gita police-na pakwataha, maina ragging ka·a man·gipa student, kenjagokaha aro gisikni gita sinjetako man·aha.
Shillong campus-oni team-ba a·sel ong·gipa Tura campus-ona nirokna sokangaha.
Ia mamlako da·ode police, am·sandianiko dakanggen ine WGH-ni superintendent of police Abraham T Sangma, aganaha.
