U·IATTIMGIPAONI
SHILLONG: NPP State president aro Rajya Sabha-ni MP, Dr WR Kharlukhi, State president-ni post-ko ra·jana ua chanchiaha aro uni academic a·bao kam ka·angskna chanchiaha.
“Anga chair-ni biapko watna chanchiaha, anga chanchia anga party-na chu·onga gitan dangdike on·aha aro angni academic a·bao kam ka·angskana ian chubatgipa somoi ong·enga ine anga chanchia,” ine Dr. Kharlukhi The Shillong Times-na aganangaha.
Assembly election ong·na skang uni kam watani lekkako on·angni bidingo kobor man·soanina ua indake aganangaha, “Anga maming saloba election-rangna skang kamoni watjawa ian kakketgijagipa kobor ong·a.”
“Kakketgipa koborde ian ia bilsini November jao angani kam ka·ani term ba bilsi bon·aha uni July jao angni kamoni watani chittiko Chief Minister-ni jako on·angaha maina anga chanchia ian adhoc president-ko rakkina national president-na altubatgen jedakode jensalo election (Lok Sabha)-na lekka puonani sokbagen unode maming neng·nikaniko chagrongangjawa,” ine ua agandapangaha.
“Election-na skang kam watani katta ian kakket ong·gijagipa ong·a, anga July jaomangmangsan on·aha maina anga party-na bilsi 16-na dangdike on·angaha aro anga ian saoba dambegiparangni dilangani somoi ong·skaengaha,” ine ua aganangaha.
Iana maiba dakgipa cholrang donga ong·ode ine sing·anina ua aganangaha, “Anga pangnan bebe ra·a jeon pangna jolnade kam ka·angkuna man·jawa aro iano dingtanganirangba dongna nanga jedakode an·chingo gitalgipa dilgipa, aro party-o chanchirakgiparang donggen.”
Politics-oni ong·katna ua chanchia ong·ode ine sing·sandianina ua aganangaha, “MP ong·a anga dangdikangkugen, 26-ona angni term bon·a bon·kuja kingkingde angni politics-ko angoniko chel·atjawa. MP aro State president ong·e apsan jako ra·e kam ka·angna adita neng·nika. Anga academic jolchipakonisa aro angni skanggipa ja·ku de·anide angni ki·tapko nakatatna uni ja·mano mai ong·gen na·simangba maming dakeba ma·sijawaha.”
Uni party uni kam watani lekkako ra·chakna sikangjaenga ingipana ua ka·dinge aganangaha, “Anga maidake kam ka·angkuna amgen? Anga gitchamgipa gure gita ong·aijok aro na·a drae kam ka·angkua ong·ode be·gruanionasa dilangaignok.”
Party-ko watna ua maina baseaha jeon ua chugipa gadango ong·engachim ine sing·anina ua aganangaha, ” Uni giminan anga wate on·a nanga jedakode jeba jako ra·ang ong·ode pilak kamrangna altubatgipa ong·anggen.”
