Git ring·susaaniko Chegim Durama chea
U·IATTIMGIPAONI
TURA: Prime Meghalaya aro Meghalaya Institute of Entrepreneurship (MiE)-ni dakchakanichi Durama Association of Music & Arts (DAMA)-ni ong·atanggipa Prime Music Incubation Program 2023-ni grand finale ba bon·kamgipa susaaniko Sonibar salo, Asanang-o ong·atangaha.
Ia bilsio ia Prime Music Incubation Program-ko jadokna ong·atangaha aro ia jadokni gisepo Garo Hills gimikoni sak 65 chadamberang bakko ra·e, git ring·susaani aro doka dam·susaanio bakko ra·angaha.
Jadokna ia program-ko ong·atanganio sak 65 chadamberang susaangani ja·man sak 18 chadamberang, bon·kamgipa salo ring·susana gita seokako man·aha aro ia bon·kamgipa salo sak 18 chadamberang susaangenba, ia susaaniko Chegim Durama cheangna man·aha.
Skanggipa biapko man·e chegipa ong·anio Chegim Durama, gong lak 4.5-ni boksisrang, music video, EP album recording, dingtang dingtang biaprango git ring·na aro live session recording-na cholrangkoba man·enga.
Gnigipa biapko Snam x Kohobodi man·skaaha aro uaba gong lak 2.5-ni boksisrang baksana music video, EP recording aro live session-rangna cholko man·enga.
Gittamgipa biapko G Hills Finest man·skaaha aro ua gong lak 1.5-ni boksisrang, live recording aro gitrangko chipna cholrangkoba man·skaenga.
Ia susaanio, Cherry Mrong-naba Best Potential Artist award-ko on·aha.
Ia Prime Music Incubation Program-ni bon·kamgipa salo, Garo Hills-ni mingsinggipa dolrang, chong·motan Riprap, Nokpante aro Da Suraka baksana Nagaland-oni Abdon Mech-ba gitrangko ring·e manderangko an·saoatangaha.