U·IATTIMGIPAONI
SHILLONG: Shillong Civil Hospital-o nanganirangko nina aro hospital-ni officer-rang chanchirimna gita Sombar salo, a·dokni Health Minister Ampareen Lyngdoh, Shillong Civil Hospital-ona re·angaha.
Ia tom·anio a·dokni Health Minister, Shillong Civil Hospital-ni officer-rang baksa chanchirimangengon, hospital-ni nanganirangko ta·raken niatna nangenga aro iani bidingo dingtangmancha project-ko tarichina gita hospital-ni engineering wing-na ge·etaniko on·angaha.
Shillong Civil Hospital-ko nambate chalaina man·na gita hospital-ni dialysis unit, operation theatre unit aro blood bank unit-o kam ka·giparangko chu·onga gita nangengani gimin hospital-ni contractual staff-ko aro mongsongbate emergency staff category ning·o dontongatako man·gipa staff-rangko ta·raken ra·pilna nangenga ineba ia tom·anio tik ka·angaha.
Hospital-o kam ka·enggipa nurse-rangna ta·raken hostel-rangko nangenga aro hospital-ni nanggitan somoirango kamrangko nambate ka·na man·na gita trauma centre baksana ICU-ko dal·batatna nangenga ineba ia tom·anio Shillong Civil Hospital-ni medical superintendent (MS) aro surgeon superintendent (SS), a·dokni Health Minister-na u·iataha.
Indake ong·engon, mikkangchi Shillong Civil Hospital-ko nambate chalaina man·na gita hospital-ni nanganirangko ta·raken on·na gita a·dokni Health Minister, ku·rachakaniko on·angaha.
