U·IATTIMGIPAONI
SHILLONG: Sonibar salo, Shillong songjinmani Police Bazar-o donggipa Janata Furniture Building-ko wa·al kamgipani bidingo sandirokaniko dakenba report-ko on·china gita Sombar salo, a·dokni Chief Minister Conrad K Sangma, official-rangna ge·etaniko on·angaha.
Sombar salo, Chief Minister an·tangan, a·dokni Chief Secretary DP Wahlang, a·dokni DGP LR Bishnoi aro gipin official-rang baksa wa·al kamgipa biapko nina re·angaha aro uano official-rang baksa agangrikenba, ia a·selni bidingo inquiry-ko dakchina ge·etaniko on·angaha.
Ia building-ara Police Bazar-o ong·e namen kenchakna nanggipa biap ong·achim ine janapatengon, wa·alko kimitna rakbee kamrangko ka·ahani gimin aro gipin biaprangona wa·alni giproroanganiko champengatna man·ahani gimin ua, Fire & Emergency Service, Army, Air Force, BSF, Assam Rifles aro ia wa·alko kimitna kam ka·anio jak on·pagipa pilak manderangkon mittelpilataha.
“Wa·alko kimitanio bang·en neng·nikanirangko man·na nangahaoba dingtang dingtang department-rang aro official-rang rakbee kamrangko ka·ahani a·sel wa·alko kimitna man·aha aro gipin biaprangona giproroanganiko champengna man·aha,” ine Sangma aganaha.
Maini a·sel ia building-ko wa·al kamahachim, iani bidingo official-rang ta·raken sandirokenba sorkarina report-ko on·anggen ineba Chief Minister parakataha.
Ia a·sel ong·anio mande saksa janggitangko gimaatna nangahani gimin an·tangni suk ong·gijaniko parakatengon, October-ni 18 tariko Cabinet tom·aniko ong·atengani gimin ia a·selni giminba Cabinet chanchijolgen ine Chief Minister parakataha.
Police Bazar-ni Janata Furniture Building-ko Sonibar salni 1:15 bajimango kamna a·bachengahachim indiba Robibar walni 10:00 bajimangosa wa·alko chu·gimik kimitna man·ahachim.
Kobor on·timgiparangni u·iatani gitade, ia biapo LPG cylinder gopretani ja·mansa ia building-ko wa·al kamna a·bachengahachim.
Ia a·selni bidingo East Khasi Hills District Administration-ni gitaba magisterial inquiry-ko dakna gita ge·etaniko on·manaha aro sal 10-ni gisepon report-ko on·china ge·etmanahachim.
Ia wa·alko kimitanio sak 100-na baten dingtang dingtang department-ni official aro gipin kam ka·giparangko rimbana gita nangaha aro komibeoba bol 14 wa·al kimitgipa garirangko jakkalna nangaha.
Kobor on·ani gitade, ia building-ko wa·al kamanio sianggipa mandeara Bhajanlal’s-o manager ong·enggipa Sampath Singh Jangir ong·achim.