U·IATTIMGIPAONI
SHILLONG: Meghalaya a·doko na·tok jile cha·enggipa manderang an·tangtangni jilenggipa na·tokrangko mesokna aro palna sim·na man·na gita Mongolbar salo, changsnigipa Meghalaya State Aqua Fest-ko Shillong songjinmani State Central Library-o a·bachengataha.
Ia State Aqua Fest-ko a·bachengatanio, a·dokni Fisheries Minister Alexander Laloo Hek, Fisheries department-ni Secretary SC Sadhu aro gipin official-rangba dongpae bak ra·angaha.
Ia Aqua Fest-ko a·bachengate on·na skang, a·dokni Fisheries Minister, jinmana aganprakangengon, ia sal somoirango a·dokni manderang pilakni gitan tang·dopana man·engahani gimin ia State Aqua Mission-ara bang·en namgni ong·enga ine parakataha.
Sorkarini ra·gate on·enggipa dingtang dingtang scheme-rangko ra·e an·tangtangni janggi tangani gadangko namdapatchina gitaba ua a·doko songdongenggipa manderangko didiataha.
Na·tok jilaniko a·doko janggi tangani chol mingsa dake ra·china didiatengon, a·doko aro mongsongbate songadam nokadamrango da·ororo bang·en na·tok pokkrirangko nikna man·engahani gimin Fisheries Minister, an·tangni kusi ong·aniko parakataha.
Meghalaya a·doko chu·onga gita na·tokrangko man·kujaengani a·sel na·tokrangko Andhra Pradesh, Karnataka aro uandakgipa gipin biaprangonikosa ra·bana nangkuenga ineba Hek, an·tangni suk ong·gijaniko parakataha.
Iana skang, Fisheries department-ni director AL Mawiong-ba jinmana aganprakangengon, a·doko State Aqua Mission-ko a·bachengatani ja·man skanggipa State Aqua Fest-ko 2005 bilsio ong·ataha ine parakataha.
Bilsio ton 30,000 na·tokrangko man·engahani gimin a·dokni nisan donaoni 50 percent-kode chu·sokatna man·aha ineba ua aganaha.