U·IATTIMGIPAONI
SHILLONG: A·dokni dingtang dingtang skulrango Mid Day Meal (MDM)-ko song·e on·enggipa aro uamangna dakchakenggipa manderangna, uamangni man·na nangkuenggipa jagittamni dormaharangko da·onan on·kujaengani gimin re·baenggipa jaonide kamtangtangko dontongna gita ka·mikkenataniko on·angaha.
MDM worker-rangni parakatani gitade, uamangni man·gnirangko somoi gita on·na sorkari ku·rachakmanahachim indiba da·o re·anggipa July jaoni September jaona kingkingan uamangni man·gnirangko on·skakujaengachim.
Indake ong·engon, a·dokni dingtang dingtang skulrango MDM-ko song·e on·enggipa manderangna aro uamangna dakchakenggipa manderangna ia jagittamni dormaharangko October 20 tarikni gisepo on·jagenchimode mikkang ja dipetde kamrangko dontongatgnok ine MDM Workers Union mikrakataniko on·angaha.
“Chinga mikkang jaonide kamrangko ka·gija jinma jingjengatanirangko dakangskagnok. Chinga kamrangko dontongatahaode skulrango poraienggipa bi·sarangsa neng·nikanirangko man·skana nanggnok,” ine union-ni dilgiparang parakataha.