U·IATTIMGIPAONI
SHILLONG: Adita salrangna skang, Mawlai Mawiong-o donggipa KHADC-ni forest check gate-o niam gri tangka gilanina rim·ako man·gipa manderangara United Democratic Party (UDP)-na kam ka·gipa manderangan ong·a ine KHADC-ni chief executive membor (CEM) Pyniaid Sing Syiem matnangataha.
Meghalaya a·doko niam gri toll gate-rangko done, bostu salgipa garirangoniko kajina gile ra·engani a·selan ma·manti bosturangni damrang tang·doenga aro iani a·sel a·doko songdongenggipa ramram manderangsa neng·nikanirangko chagrongna nangtokenga ine salsa skangsan UDP-ni general secretary Jemino Mawthoh parakatahachim ine nikna man·a.
Indake ong·engon, niam gri kajina gile ra·enggipani bidingo Meghalaya Commercial Truck Owners & Drivers Association-ni badi ka·anirangko man·soani ja·man, KHADC-ni check gate-rangko chalaienggipa manderangna KHADC, show cause notice-rangko on·manahachim ine KHADC-ni CEM, kobor ra·timgiparangna parakatskaaha.
“Check gate-rango niam gri kajinarangko gile ra·enga ine matnangenggipani bidingo chinga police-rangnaba u·iataha aro Mawlai Mawiong-o KHADC-ni check gate-o niam gri tangka gile ra·enggipa manderangko police-rang rim·aha,” ine Syiem aganaha.
Syiem-ni parakatani gitade, rim·ako man·gipa manderangoni bang·batan UDP-na kam ka·giparangsa ong·achim ine police-rang ma·sina man·aha.
“UDP-na kam ka·gipa manderangko rim·anian niam gri kajina gile ra·anio sawarang jak donga, uko mesokani ong·aha. Ia check gate-rangko skangonin chalaiengon da·o NPP-chi dilenggipa Executive Committee-ko matnanganiara kraani ong·ja,” ine Syiem aganaha.
Constitution-ni Sixth Schedule-o on·gimin niamrango pangchakesa KHADC, ia check gate-rangko kuliaha ineba CEM parakataha.
KHADC-ni election da·o sepangengahani gimin UDP-ni iandake matnanganirangara maming aiao inmanani dongja ineba Syiem parakataha.
Meghalaya a·dokni dingtang dingtang biaprango niam gri kajina gilenggipa gate-rangni kosako ta·raken ja·kurangko de·china aro iandakgipa toll gate-rangko chipatchina gita UDP, a·dok sorkariko aro Autonomous District Council (ADC)-rangko didiatahachim ine nikna man·a.
“A·dokni dingtang dingtang biaprango toll gate-rangko done maikai tangka paisarangko indin gile ra·na man·a? Iandake niam gri chalaienggipa pilak toll gate-rangko chipattokna nanga. Niam gri kajinarangko gile ra·engani a·selan a·doko songdongenggipa manderangsa nangchakeanirangko man·skaenga,” ine UDP-ni general secretary Jemino Mawthoh aganahachim.
