U·IATTIMGIPAONI
SHILLONG: Meghalaya a·doko Congress dolko wate katgipa manderangoni mitamde re·bapilna gita unbaksa agangrikenga ine Bristibar salo, All India Congress Committee (AICC)-ni secretary Meghalaya in-charge Manish Chatrath parakataha.
Meghalaya a·dokni gitcham chief minister Dr Mukul Sangma-ba Congress-ona re·bapilna siengama ine sing·on, ua darangkoba biming mingna sikkujaenga ine Chatrath parakataha.
“Saoba Congress-ona re·bapilna sikenga ong·ode uamang Meghalaya Pradesh Congress Committee (MPCC)-ni president-na u·iatgen aro uko ja·mano AICC-ona watdoatskagen,” ine AICC-ni secretary Meghalaya I/c, kobor ra·timgiparangna aganaha.
Chatrath-ni parakatani gitade, uamangni Karnataka a·dokona re·angani somoioba uano bang·a dilgiparangan Congress dolko watange re·bapilna sikgipa manderangni gimin knabaaha.
Congress dolko watanggipa mitam dilgiparangde Congress-ona re·bapilna gita gipin dilgiparang baksa agangrikenga aro mitamde unbaksaba agangrikenga ineba ua parakataha.
“Politics-ni kamode na·a chegipa ong·ahaode nang·ko wate katgipa manderangba nang·ona re·bapilna skaia,” ine ua aganaha.
Gitcham dilgiparangoni Congress-ona re·bapilna sikgiparang dongama dongja ukode MPCC-ni president-sa nambate aganchakna man·gen ineba AICC-ni secretary Meghalaya I/c parakataha.
